Дьокуускайга АЗС-тарга уочараты аҕыйатар туһуттан, уматыгы кутар саппыраапкалар ахсааннарын “СибОйл” уонна “Туймаада-нефть” ыстаансыйаларын суотугар элбэтиэхтэрэ. Ол туһунан СӨ Ил Дархана Айсен Николаев суруналыыстарга иһитиннэрдэ.
Бары билэрбит курдук, өстөөх ньиэби таҥастыыр суобуттарга (НПЗ) дронунан саба түспүтүн түмүгэр, бүтүн дойду үрдүнэн уматык кыһалҕата сытыырхайда. АЗС-тарга хаһыс да күнүн тимир көлө халыҥ халҕаһата үтүрүйсэ-анньыһа турар. Ону аҕыйатар уонна дьону кыынньаабат туһуттан, өрөспүүбүлүкэ салалтата “СибОйл” уонна “Туймаада-нефть” хампаанньаларга бэнсиини иэс биэрэн, кинилэр АЗС-тарын нөҥүө бэнсиини кутан саҕалыырга сорудах биэрдэ. Онон “СТНС” АУо бэнсиинин бу саппыраапкаларынан үллэрэн кутан саҕалаата. “СибОйл” номнуо иэс ылан, кутан саҕалаан эрэр. Билигин “Туймаада-нефть” салалтатын кытта нуорманы үрдэтэр туһунан кэпсэтиилэр бара тураллар.
Ил Дархан Айсен Николаев иһитиннэрбитинэн, быйылгы сыл биир суолталаах боппуруоһа - хоту улуустарга таһаҕаһы тиэрдии бүтүннүү быһаарыллыбыт, о.э. уматык тустаах кээмэйэ уу аалларыгар тиэллэн номнуо устан иһэр. Оттон өрөспүүбүлүкэҕэ эбии уматыгы тиэйэн аҕалыы салҕанан бара турар, саҥа баартыйа бэнсиин хайыы үйэ айаҥҥа туруммут. Онон, сотору кэминэн, кыһалҕа этэҥҥэ быһаарылларыгар эрэнэбит.
Kyym.ru.
