Нэдиэлэтээҕи былаанныыр мунньахха Дьокуускай куорат мээрэ Дмитрий Садовников “шаурма” киоскаларын боппуруоһун тэрилтэлэр икки ардыларынааҕы мунньаҕы тэрийэн дьүүллэһэргэ сорудах биэрдэ. Бу төрүөтүнэн – өссө эбии дьон мөлтөх хаачыстыбалаах астан сүһүрүүтэ буолбут.
Былаанныыр мунньахха маннык сорудаҕы Дьокуускай куорат урбааҥҥа департамена ылла. Бу мунньахха СӨ урбааҥҥа, атыыга-эргиэҥҥэ уонна туризмҥа министиэристибэтин, Роспотребнадзор уонна ИДьМ салалтата уонна бэрэстэбиитэллэрэ кытталлара былааннанна. Бу дьон чопчу уопсастыбаннай аһылык боппуруоһунан, о.э. чуолаан “шаурманан” эргинэр киоскалар кыһалҕаларын дьүүллэһиэхтэрэ.
Тоҕо бу кыһалҕа эмискэ күөрэс гынна диэтэххэ, маны санатыахпытын баҕарабыт. Атырдьах ыйын саҕаланыыта шаурманы сиэн баран, уон киһи күүскэ сүһүрбүтэ, ол иһигэр алта оҕо. Оттон ааспыт нэдиэлэҕэ, эбии икки киһи ыалдьан, өссө биир киоска 90 хонукка сабыллыбыта.
Санатан эттэххэ, бу сыл саҕаланыаҕыттан шаурма Саха сиригэр муҥур элбэхтик атыылаһыллар фаст-фуд көрүҥэ буолбут. Атыыта, бэл, тута 45 % былырыыҥҥытааҕар үрдүү түспүт. Онон, дьон бачча сөбүлээн атыылаһар аһа, биллэн турар, хаачыстыбалаах уонна дьон доруобуйатыгар буортута, охсуута, куттала суох буолуохтааҕа өйдөнөр.
Kyym.ru.
Хаартыска: Сонун национальнай сулууспата.
