От ыйын бүтүүтүгэр Ньурба улууһугар сүппүт 1978 сыл төрүөх эр киһи тыыннаах көһүннэ. Эр киһи атырдьах ыйын 23 күнүгэр Хорула бөһүөлэгэр бэйэтэ тахсан кэлбит. Ол туһунан Саха сирин быыһыыр сулууспата иһитиннэрэр.
Эр киһи кэпсээбитинэн, муна сылдьыбыт кэмин устата бөһүөлэктэн олох чугас сылдьабын дии санаан, хаамарын олох тохтоппотох. Кини Ньурбатааҕы көрдүүр-быыһыыр этэрээт салайааччыта Афанасий Ноевка эппитинэн, отучча күн сүтэ сылдьыбытыттан аҕыс күнүн үүтээҥҥэ түбэһэн олорбут. Хата онно бурдук баарын булан, сир аһын кытта лэппиэскэлээн сиэбит. Үүтээҥҥэ таҥас-сап эмиэ баар эбит. Муна сылдьыбыт кэмигэр бэйэтин атаҕын таҥаһа бүттэтэ суох буолбут, туһаттан тахсыбыт. Дьолго биир солооһунтан киирсэбэй саппыкы булан кэппит.
Санаттахха, эр киһи от ыйын 26 күнүгэр Чкалов бөһүөлэгиттэн тыраахтарынан тахсан барбыта. Тиэхиньикэтин бөһүөлэктэн балтараа килэмиэтирдээх Бөрө Бааһыната диэнтэн булбуттара эрээри, эр киһи бэйэтэ көстүбэтэҕэ. Онтон бэттэх кинини ый кэриҥэ көрдөөтүлэр.
