Мээр Дмитрий Садовников уматыгынан хааччыйыы суһал ыстаабын мунньаҕар уочаракка бэрээдэги кыраҕытык хонтуруоллуурга соруйда. Мээр эппитинэн, дьон билигин икки суолга долгуйар: уматык ханна баарын-суоҕун дьэҥкэтик билиэн уонна сапыраапкаларга уочарат тутуһуллуон баҕарар.
“Дьон бу билигин, бу түгэҥҥэ, уматык ханнык сапыраапкаҕа баарын билиэн баҕарар, суох сиригэр кураанахха барбат курдук. Өрөспүүбүлүкэтээҕи ыстаабы уонна хампаанньалары кытта суһал субуокканы биэрэ олорор курдук кэпсэттибит”, – диэн мээр суруйбут.
Кини этэринэн, дьон сапыраапкаларга сүрүннээн бэйэ-бэйэтин ытыктаһар, хардары көмөлөсүһэр эрээри, уочараты кэһээччилэр да суох буолбатахтар.
“Бэрээдэги олохтуохпут: саамай элбэх уочараттаах сирдэргэ быраабы араҥаччылыыр уорганнар дьуһуурустабаны тэрийиэхтэрэ”, – диэбит ДСадовников.
