Саха сиригэр Култуура сылыгар муосчут, ювелир, СӨ народнай худуоһунньуга, Арассыыйа Федерациятын үтүөлээх худуоһунньуга Георгий Николаевич Родионов дьиэ кэргэнэ улуу маастар 72 ураты оҥоһугун Национальнай художественнай түмэлгэ бэлэхтээтэ.
“Худуоһунньук дьиэ кэргэнин аатыттан кыыһа Варвара Георгиевна Куличкина, аҕаларын баай нэһилиэстибэтэ биирдиилээн дьон кэлиэксийэлэринэн ыһыллан, сүтэн, симэлийэн хаалбатын туһугар, бу биир кэлим ураты улахан кэлиэксийэни өрөспүүбүлүкэ түмэлигэр, бүтүн норуот илиитигэр туттарда, бэлэхтээтэ”, – диэн, түмэл сүрүн билимҥэ үлэһитэ Ася Габышева кэпсээтэ.
Худуоһунньук, педагог уонна чинчийээччи Георгий Николаевич Родионов бэйэтин олоҕун саха төрүт уус-уран оҥоһугун харыстааһыныгар уонна сайдыытыгар анаабыта. Кини сэлии муоһуттан сүүһүнэн айымньылары оҥорон хаалларбыта – сабардамнаах (объемнай) пластиканы, рельефтэри, чорооннору, кубоктары, дуобаттары, быһахтары, табах тардар туруупкалары, о.д.а. Кини үлэлэрэ өрөспүүбүлүкэ, бүтүн Арассыыйа уонна аан дойду таһымнаах быыстапкаларга элбэхтик көрдөрүллүбүттэрэ.
“Биһиги бу улуу муосчут айар үлэтин сайдыытын бүтүннүү көрдөрөр биир кэлим монографическай кэлиэксийэни бэлэх ыллыбыт. Ордук сэлии муоһуттан оҥоһуллубут айымньылара ураты сыаналаахтар уонна суолталаахтар”, – диэн түмэл генеральнай дириэктэрэ Влада Тимофеева бэлиэтээтэ.
Онон, ааҕааччыларбыт, улуу муосчут үлэлэрин Национальнай художественнай түмэлгэ көрүөххүтүн сөп буолла.
Ыспыраапка
Георгий Родионов (1945-2026) 1945 сыл сэтинньи 12 күнүгэр Чурапчы улууһун Дириҥ нэһилиэгэр төрөөбүтэ. 1968 с. Дьокуускайдааҕы художественнай училищены, онтон 1993 с. СГУ педагогическай факультетын бүтэрбитэ. Оскуолаларга, култуура дьиэлэригэр үлэлээбитэ, художественнай училищеҕа уһуйааччынан сылдьыбыта, Дьокуускайдааҕы ювелирнай собуот уонна аан дойдутааҕы Сэлии түмэлин кылаабынай худуоһунньуга буола сылдьыбыта. Араас сылларга СГУ инженерно-техническай институтун култуура уонна ускуустуба кафедратын доцена, М.К. Аммосов аатынан ХИФУ архитектура уонна куорат тутуутун кафедратын доценынан үлэлээбитэ.
Kyym.ru.
СӨ Ил Дарханын уонна Бырабыыталыстыбатын пресс-сулууспатын матырыйаалынан.
