Атырдьах ыйын 18 күнүгэр СИА суруйарынан, Дьокуускайдааҕы килиэп кэмбинээтэ сыананы үрдэппэтэҕин туһунан биллэрбит.
Санатан эттэххэ, социальнай ситимнэргэ килиэп сыаната үрдээбитин туһунан аймалҕан тахсан турар. Ону СИА тустаах тэрилтэттэн быһаччы чуолкайдаспыт.
- 2026 сыл олунньу 5 күнүттэн күн бүгүнүгэр диэри килиэп бородууксуйатын сыаната уларыйа илик. Билиҥҥи сыаналар оннунан хаалан тураллар, – диэн кэмбинээт сүрүн дириэктэрин солбуйааччы Саргылана Скрыбыкина хоруйдаабыт.
Кэмбинээт дьаһалтата олохтоохтору тэрилтэ дьиҥнээх иһитиннэриилэригэр эрэ итэҕэйэллэригэр, ылыналларыгар ыҥырар. Бүтэһик сыана үрдээһинин туһунан санатан аастахха, кэмбинээт үрүҥ килиэп сыанатын олунньу 5 күнүгэр 3 солк. үрдэппитэ, оттон Нөмүгүтээҕи килиэп собуота – 12 солк.
Санатан эттэххэ, килиэп сыанатыгар маҕаһыыннар эмиэ дьайаллар. Кинилэр бородууксуйаны эбэн атыылыахтарын сөп.
Kyym.ru
Хаартыска: мойбизнес14.рф
