Дьокуускайга уопсастыбаннай бэрээдэги көрөр норуот дружинатын үлэтин сөргүттүлэр. Ол туһунан киин куорат пресс-сулууспата суруйар.
Атырдьах ыйын 14 күнүгэр полиция үлэһиттэрэ дружинниктарга инструктаж ыыппыттар. Ол кэннэ үтүө баҕаларынан бэрээдэги көрүөн-истиэн баҕалаахтар Эргэ куораты кытты өрүс кытылы ботурууллу тахсыбыттар. Билиҥҥитэ кинилэр бэһиэлэр эрэ.
Норуот дружината куорат ити түөлбэлэригэр олорор дьон “ыччаттар киэһэтин-түүнүн тыаһыыллар-ууһууллар, айдарааллар” диэн үҥсүүлэринэн, саҥа мээр Дмитрий Садовников дьаһалынан сөргүтүллүбүт. Аны өтөр “Гражданнар уопсастыбаннай бэрээдэк харыстабылыгар кыттыылара” федеральнай сокуон чэрчитинэн, ити уопсастыбаннай үлэҕэ казактары уонна бойобуой дьайыы бэтээрээннэрин кытыарыахтара диэн суруйаллар.
Ботуруулга эрэгийиэн реестригэр киирбит дружинниктар сылдьыахтара үһү.
