Атырдьах ыйын 12 күнүнээҕи туругунан, Саха сирин хаһаайыстыбалара 691,9 туонна диисэли уонна 13,1 туонна бэнсиини ыллылар. Ол туһунан СӨ Тыатын хаһаайыстыбатын уонна аска-үөлгэ бэлиитикэтин министиэристибэтэ иһитиннэрдэ.
Ааспыт уонна бу үүммүт ыйдарга тыа сирин оҥорон таһаарааччылара паардаммыт сири-уоту оҥороллоругар, туорахтаах үүнээйини олордоллоругар уонна сүөһү аһылыгын бэлэмнииллэригэр анаан уопсайа 1579,9 туонна диисэлгэ уонна 290,6 туонна бэнсииҥҥэ сөбүлэҥ түһэрсиллибит. Сүөһү аһылыгын бэлэмнээһин хампаанньатын ыытыыга ТХМ СӨ Гражданскай оборуонаҕа уонна олох-дьаһах куттала суох буолуутун хааччыйыы министиэристибэтин кытта хаһаайыстыбалар уматыгы анал иһиттэргэ куттаран ылалларыгар туспа бэрээдэги бигэргэппиттэр.
Нэдиэлэ ахсын ТХМ суһал ыстааба балаһыанньаны кэтээн көрө олорор, улуус баһылыктарын уонна тэрилтэ салайааччыларын кытта үлэ хаамыытын тиһигин быспакка билсэ турар. Билигин сүөһү аһылыгын бэлэмнээһиҥҥэ уонна окко өрөспүүбүлүкэ үрдүнэн уопсайа 22 411 үлэһиттээх 7970 звено үлэлиир, ол иһиттэн 2863 толору тиэхиньикэлээх, 3234 аҥаара тиэхиньикэлээх, 24 ат көлөлөөх уонна 1849 илии күүһүнэн үлэлиир звенолар күнү-дьылы баттаһа түбүгүрэ сылдьаллар.
Билиҥҥитэ 167817 га иэннээх ходуһа оттонно, манна 157952 туонна от бэлэмнэннэ, 880 туонна сиилэс уонна 452 туонна сенаж хомулунна.
Даҕатан эттэххэ, быйыл өрөспүүбүлүкэ хаһаайыстыбалара кыстыгы 423,7 туонна оту, 29,9 туонна сиилэһи уонна 14,75 туонна сенаһы бэлэмнээн көрсүөхтээхтэр.
СӨ Ил Дарханын уонна Бырабыыталыстыбатын пресс-сулууспатын матырыйаалынан.
Хаартыска: ТХМ.
