Атырдьах ыйыттан саҕалаан Саха сиригэр уматык хааччаҕын кыралаан сымнатан эрэллэр. Соҕурууҥҥу улуустарга АИ-92 мааркалаах бэнсиин лимиитин сууккаҕа 25, оттон АИ-95 мааркалааҕы – 40 туоннаҕы диэри эптилэр. Уматык балаһыанньатын туһунан Айсен Николаев кэпсээтэ.
Ордук тыҥааһыннаах балаһыанньа соҕурууҥҥу улуустарга үөскээбитэ. Онно АИ-92 мааркалаах бэнсиин сууккатааҕы лимиитин 9 туоннаҕа диэри тиэрдэ сылдьыбыттара.
“Атырдьах ыйын 7-с күнүттэн АИ-92 мааркалаах бэнсиин сууккатааҕы атыыланар лимиитин 20 туоннаҕа, 95-тээҕи 40 туоннаҕа диэри улаатыннардыбыт. Билигин 92-лээх бэнсиини 25 туоннаҕа диэри элбэтэргэ быһаардыбыт. Бу күннэргэ 95-тээх бэнсиин сүөкэнэн бүттэҕинэ, ол лимиитин эмиэ үрдэтиэхпит. Уопсайынан, атырдьах ыйыгар уматык балаһыанньатын көннөрүөхпүт, хааччахтыыр миэрэ биллэр-биллибэт буоларын курдук”, – диэн Айсен Николаев “Прямой разговор” быһа эфиригэр кэпсээтэ.
Тыа хаһаайыстабытын оҥорон таһаарааччыларын уматыгынан салгыы хааччыйаллар. Хотугу завозка тиийиэхтээх уматыкка боппуруоһа эмиэ быһаарыллыбыт, уматык улахан аҥаара номнуо тиэллэн кэлэн иһэр.
“Уматык балаһыанньата дойду үрдүнэн Украина пилота суох көтөр аппараата ньиэп собуоттарыгар саба түспүттэрин кэннэ үөскээбитэ. Собуоттар үлэһиттэрин дьоруойдуу үлэлэрин түмүгэр, собуоттар улахан аҥаардара чөлүгэр түстэ. Балаһыанньа сыыйа оннук булан эрэр. Өрөспүүбүлүкэ олохтоохторугар тулуурдарын, өйдүүллэрин иһин махтанабын”, – диэтэ Ил Дархан.
