Үөһээ Дьааҥы улууһун биэс нэһилиэгэр устудьуоннар тутар этэрээттэрин 60 байыаһа үлэлии сылдьар. Ыччаттар халаан кэннэ күөдэл-таһаан буолбут нэһилиэктэри, тутууну-хаһааны чөлүгэр түһэрэллэр. Ол туһунан ыччат миниистирин солбуйааччы Александр Максимов кэпсээтэ.
Устудьуоннар Дулҕалаахха, Суордаахха, Сайдыыга, Боронукка уонна Верхоянскай куоракка үлэлииллэр. 29 байыастаах бастакы бөлөх улууска атырдьах ыйын 4 күнүгэр тиийбитэ, өссө 31 байыас – атырдьах ыйын 6 күнүгэр.
Этэрээттэргэ өрөспүүбүлүкэ араас үөрэҕин кыһатын устудьуоннара киирэллэр. Бары инструктаһы ааспыттар, үгүс ыччат урут маннык үлэҕэ сылдьыбыт уопуттаах. Ыччаттар нэһилиэктэри ыраастыыллар, ууга барбыт дьиэ-уот муостатын көтүрэллэр, дьон олорор дьиэлэрин, социальнай эбийиэктэри куурдаллар, чөлүгэр түһэрэллэр.
Александр Максимов эбэн эппитинэн, Үөһээ Дьааҥы олохтоохторугар гуманитарнай көмөнү хомуйуу салҕанар. Саха сирин Үтүө көмө киинигэр аһы-үөлү, ууну, тутуу матырыйаалын, үстүрүмүөнү, күннээҕи туттар малы-салы туталлар.
