Арассыыйа сүрүн борокуруорун солбуйааччы Виктор Мельник Саха сиригэр кэлэн үлэлээтэ. Бастатан туран, Дьокуускайга саҥа үөрэх тэрилтэлэрин тутууларын хаамыытын кэрийэн көрдө. Эбийиэктэри Ил Дархан Айсен Николаев арыаллыы сылдьан көрдөрдө.
Бастатан туран, борокуруор Дьокуускай куорат Звёзднай түөлбэтигэр тутулла турар 990 миэстэлээх таас оскуолатыгар уонна 315 миэстэлээх оҕо уһуйааныгар сырытта, итиэннэ Пирогова уулуссаҕа тутуллуохтаах 4-с №-дээх анал коррекционнай оскуола тутуутун былаһааккатыгар киирэн таҕыста. Бу сырыы кэмигэр бэрэбиэркэлээччилэр хантыраактар олоххо хайдах киирэн иһэллэрин, тустаах үлэлэр тэтимнэрин уонна тутуу хаамыытынан тахса турар эбии боппуруостары, ымпыктары-чымпыктары дьүүллэстилэр.
Звёзднайга тутулла турар 990 миэстэлээх саҥа таас оскуола киин куорат биир саамай улахан үөрэҕин тэрилтэтинэн буолуохтаах. Билиҥҥитэ тутуу 79 % ситэриллибит. Ол курдук, оскуола сыбаайата, холлоҕоһо бүтэн, үрдэ сабыллан турар. Билигин инженернэй ситимнэрин, уотун-күөһүн тардыы, дьиэни ититии уонна ис-тас үлэлэрэ бара тураллар. Ону кытта тиэргэнин тупсараллар. Былаан быһыытынан, оскуола 2026 сыл бүтүүтэ үлэҕэ киириэхтээх.
Аны, бу оскуола аттыгар 315 миэстэлэээх оҕо уһуйаана тутулла турар. Үлэтэ-хамнаһа 46 % түмүктэммит. Билиҥҥитэ сыбаайатын уонна холлоҕоһун үлэлэрэ бүтэннэр, тутааччылар эркиннэрин сабан сылдьаллар. Маны таһынан, кырыыһатын уонна салгылатар систиэмэтин, түннүгүн-үөлэһин, пандустары уонна дьиэ иһин “хара” үлэтин оҥоруу салҕанан бараллар. Билиҥҥитэ тутуу силигин ситэригэр эбии үп-харчы ситэри тиийбэтэ, көрүллэн испэтэ моһуоктаабыт. Маны сэргэ, иниспиэксийэ 180 миэстэлээх 4-с №-дээх анал коррекционнай оскуола тутуутун хаамыытын кытта билистэ. Билиҥҥитэ үлэ 35 % оҥоһуллубут. Холлоҕоһун сүрүн конструкцията турбут, инженернай ситимнэри тардыы уонна тутуу былаһааккатын төгүрүйэ хааччах тутуута саҕаламмыт. Бу оскуола 2027 сылга бүтүөхтээх.
Виктор Мельник балаһыанньаны кытта сиһилии билсэн баран, Дьокуускайга, Мэҥэ Хаҥаласка, Намҥа уонна Сунтаарга тутулла турар кыһалҕалаах эбийиэктэр тула сүбэ мунньах тэрийдэ. Манна министиэристибэлэр, судаарыстыбаннай сакаасчыттар, бэдэрээттээх тэрилтэлэр туох төрүөтүнэн кыһалҕалар үөскээбиттэрин, тутуулары кэмигэр түмүктүүргэ туох миэрэлэр ылылла туралларын иһитиннэрдилэр, быһаардылар.
Холобур, Мэҥэ Хаҥаласка Майа сэлиэнньэтигэр тутуллар турар балыыһа тутуута баара-суоҕа 39 % тэҥнэспит. Билигин эрдэтээҥҥи бэдэрээттээх тэрилтэни кытта сөбүлэҥи көтүрбүттэр, саҥа бэдэрээччити кытта дуогабардаһан, үлэ хаттаан саҕаламмыт. Намҥа 450 миэстэлээх оскуола тутуута эмиэ "доҕолоҥнообут". Дьиҥэ, эбийиэк 70 % бэлэм буолбут эрээри кэккэ төрүөтүнэн судаарыстыбаннай хантыраагы көтүрэргэ күһэллибиттэр. Билиҥҥитэ саҥа бырайыактыыр докумуоннары бэлэмнээн, бэдэрээччити быһаарар куонкурс бэлэмнэнэ сылдьар. Маны таһынан мунньах кыттыылаахтара Сунтаарга 450 миэстэлээх лиссиэй-интернат тутуутун тула кэпсэттилэр. Эбийиэк 90 % бэлэм буолбут. Тутууга 60 киһилээх биригээдэ эбийиэги кэмигэр үлэҕэ киллэрэргэ түбүгүрэ сылдьара этиллибит. Сүрүн мунньах кэннэ Виктор Мельник Ил Дархан Айсен Николаев кыттыылаах олохтоохтору кытта сирэй көрсүһүүлэри тэрийдэ. Манна дьон тус интэриэстэрин сокуонунан көмүскэтэргэ сыһыаннаах ыйытыыларынан кэлэ сырыттылар.
Бэй. кэр.
Хаартыска: СИА.
