Дойду бэрэсидьиэнэ Владимир Путин Андрей Саввич Борисовка Арассыыйа Федерациятын Үлэҕэ Дьоруойа бочуоттаах ааты иҥэрдэ. “Бу кини Саха сирин уонна бүтүн дойду култууратыгар киллэрбит сүдү кылаатын билинии”, – диэн Ил Дархан Айсен Николаев эҕэрдэтигэр суруйда.
Андрей Саввич Борисов – Арассыыйа норуодунай артыыһа, ССРС уонна Арассыыйа судаарыстыбаннай бириэмийэлэрин лауреата, “Көмүс мааска” бириэмийэ кыайыылааҕа, Саха сирин бочуоттаах олохтооҕо. Үйэ чиэппэрин кэриҥэ култуура миниистирэнэн үлэлээбитэ, Култуура уонна ускуустуба Арктикатааҕы судаарыстыбаннай университетын, Олоҥхо тыйаатырын төрүттээбитэ. Билигин Эпос уонна ускуустуба Арктикатааҕы киинин салайааччыта.
Түгэни туһанан, "Кыым" үтүө доҕорун, бастыҥ сүбэһитин бу сүдү ааты сүкпүтүнэн истиҥ эҕэрдэбитин тиэрдэбит!
