Халаан муҥутуур кирбиитин аһардыбыт. Билигин хоромньуну ааҕыахпытын, чөлүгэр түһэрэргэ үлэлэһиэхпитин, эмсэҕэлээбит тыа хаһаайыстыбатын оҥорон таһаараччыларыгар көмөлөһүөхпүтүн наада. Ол туһунан Айсен Николаев эттэ.
“Булгуччу көмөлөһүөхпүт. Чуолаан, халаантан эмсэҕэлээбит нэһилиэнньэлээх пууннар уонна тыа хаһаайыстыбатын оҥорон таһаараччыларын кыһалҕаларын быһаарарга бырамыысыланнай хампаанньалартан көрдөһүөхпүт. Ордук уустук балаһыанньа Үөһээ Дьааҥыга үөскээн турар. Атын да улуустар ходуһалара ууга барда. Холобур, Сунтаарга уонна Өлүөнэни бата сытар улуустарга. Тыа хаһаайыстыбатын министиэристибэтэ этэринэн, барыта 26 тыһыынча гаа иэннээх ходуһа-бааһына ууга барда. Онон дьиҥнээх хоромньу төһөтүн ааҕыахпыт. Ол гынан баран, биһиги аграрийдар сыл тахсар отторун төһө кыалларынан бэйэлэрэ булуна сатыылларыгар үлэлэһиэхпит. Даҕатан эттэххэ, былырыын куһаҕана суохтук оттообуппут, онон хаһаастаахпыт”, – диэтэ Айсен Николаев.
Итини таһынан Ил Дархан от, сенаж уонна сиилэс быйылгы былаана хайаан да туолуохтааҕын бэлиэтээтэ.
