Дьааҥы өрүс уута кыралаан түһүөхчэ буолан эрэр эрээри, балаһыанньа билигин даҕаны бэрт тыҥааһыннаах. Ол туһунан атырдьах ыйын 2 күнүнээҕи мунньахха СӨ гражданскай оборуонаҕа миниистирин солбуйааччы Айаал Вензель иһитиннэрдэ.
Верхоняскай куорат таһыгар уу “кутталлаах” (1020 см) дэнэр кирбииттэн түһэн, 993 см тэҥнэспит. Ааспыт 12 чаас иһигэр уу таһыма 35 см түспүт. Ол үрдүнэн куорат иһигэр 154 тиэргэн, 25 дьиэ, 7 социальнай эбийиэк территорията ууга тураллар.
Боронук бөһүөлэгэр ааспыт 12 чаас иһигэр уу 35 см түһэн, 993 см тэҥнэспит. “Кутталлаах” дэнэр кирбии 970 см. 70 тиэргэнтэн халаан уута барбыт. Өссө 10 чааһынай ыал уонна 6 социальнай эбийиэк тиэргэнэ ууттан босхолоноро хаалан турар.
Баатаҕайга уу төттөрүтүн 5 см эбиллибит. Ити күннээҕи туругунан, уу таһыма 953 см дэнэр (кутталлаах кирбии – 950 см). Үс тиэргэн ууга турар.
Томтор бөһүөлэгин таһыгар Дулҕалаах үрэх уута түһэн эрэр. Ааспыт 12 чаас иһигэр 23 см намтаабыт.
Индигиир өрүс уутун таһыма этэҥҥэ, кутталлаах кирбииттэн ыраах. Уус Ньара, Хонуу уонна Буор Сыһыы анныларынан уу таһыма тахсыбат. Кэбэргэнэ таһыгар 19 см түспүт. Онно 18 тиэргэн уонна 1 дьиэ ууга баран тураллар.
Сунтаар бөһүөлэгэр 28 тиэргэнтэн ууну хачайдыыллар. Туойдаахха тиийэр суол быстан турар.
