Тохтоло суох түһэр ардахтан сылтаан Саха сирин алта улууһугар от үлэтэ атахтанна, дьон номнуо охсубут, кэбиспит ото ууга былдьанна. Бу күннэргэ исписэлиистэр өрөспүүблүкэ үрдүнэн халаантан сылтаан төһө хоромньу тахсыбытын ааҕаллар. Ол туһунан тыа хаһаайыстыбатын миниистирэ Артем Александров эттэ.
“Алта улууска, ол иһигэр хоту Эбээн Бытантайга уонна Үөһээ Дьааҥыга, балаһыанньа ыараан турар. Бу күннэргэ хоромньуну ааҕа сылдьаллар, уу түһэ илик, элбэх ходуһа уу анныгар сытар. Номнуо кэбиһиллибит-урулуоннаммыт оттор ууга бардылар, намыһах сирдэргэ охсуу эмиэ былдьанна. Эппитим курдук, билигин хоромньуну ааҕаллар, бары улуустарга актары тиэртибит. Бу балаһыанньаттан тахсыахпыт дии саныыбын. Сүрүн сорукпут – былырыын хаһааныллыбыт сүөһү дороххой аһылыгын ааҕан туран, ааспыт сыллааҕы көрдөрүүнү ситиһии”, – диэн миниистир кэпсээтэ.
