Бу күннэргэ “ВИС” хампаанньа Өлүөнэ күргэтин сүрүн атаҕа туруохтаах киин коффердамын өрүс сүнньүгэр киллэрэн түһэрдэ. Ол туһунан хампаанньа пресс-сулууспатыгар иһитиннэрдилэр.
Санаттахха, 9-с №-дээх саамай сүрүн атах туруохтаах коффердамын эбэҕэ от ыйын 17 күнүгэр киллэрбиттэрэ. Бу күргэ итинник тииптээх саамай улахан конструкцията буолар. Оборудованиетын кытта бүттүүн ыйааһына 4 тыһыынча туонна кэриҥэ. Коффердамы киллэрэргэ ЛОРП тэрилтэ үс улахан буксира, икки рулевой буксир уонна 65 исписэлиис үлэлээбиттэр.
Ити иннинэ коффердам туруохтаах сиригэр өрүс анныттан уопсайа 62 000 кууп кумаһы-бадарааны хостоон таһаарбыттара, өрүс түгэҕин, быһыытын-таһаатын сканердаабыттара. Конструкция дьэ түстэ. Мантан антах коффердам иһинээҕи ууну барытын оборторон ылан баран, сыбаайа түһүөхтээх дьөлөҕөстөрүн үүттүөхтээх буурдары киллэрэн туруоруохтаахтар.
Өлүөнэ күргэтэ Арассыыйа биир саамай улахан кэнсиэссийэлээх бырайыага буолар. “Олох инфраструктурата” национальнай бырайыак чэрчитинэн тутуллар. Сүрүн кэнсиэссийэлээх генеральнай бэдэрээччит – “ВИС” хампаанньа. Сакаасчыт, бас билээччи – өрөспүүбүлүкэ бырабыыталыстыбата. Ил Дархан 2026 с. ПМЭФ-кэ эппитинэн, күргэ 2029 с. үлэҕэ киириэхтээх.
