Саха сириттэн анал байыаннай дьайыыга кытта сылдьар буойуннарга аҕыс тиэхиньикэни тиэртилэр. Ол иһигэр биир “Тимир Ат” матасыыкылы. Ол туһунан өрөспүүбүлүкэ тирэх пууннарын сүрүннээччитэ Юстас нэдиэлэтээҕи брифиҥҥэ кэпсээтэ.
Нэдиэлэ иһигэр Саха сирин байыастарыгар барыта 131 баһыылканы тиэрпиттэр.
“Төһө даҕаны инники кирбии таһынааҕы балаһа суолларыгар быһыы-майгы судургута суох буоллар, тирэх пуун экипажтара 14 сырыыны оҥордулар”, – диэтэ Юстас.
Кини этэринэн, бу күннэргэ мэхээнньиктэр биир армейскай анал тырааныспары чөлүгэр түһэрбиттэр. Өссө 12 араас тиэхиньикэ оҥоһулла турар. Ону таһынан Оборуона министиэристибэтин Сүрүннүүр киинин кытта сураҕа суох сүппүттэри көрдүүр үлэ тохтообот.
Бэй.кэр.
Хаартыска: “Саха.гов.ру”.
