Арассыыйа Дьоруойа, номоххо киирбит Андрей Григорьев-Тута Ньурба улууһун урбааҥҥа департаменын көмөтүнэн “Туута” диэн тус бренин бэлиэтэттэ.
Тута бэйэтин аатынан сүбэниири уонна анал бородууксуйаны оҥорор былааннаах, аатын-суолун ол иһин харыстыырга быһаарыммыт. Урбаан департамена докумуону оҥорторого көмөлөспүт, сайаапканы Роспатеҥҥа ыыппыт.
Бу күннэргэ докумуон бигэргэнэн кэлбит, 2035 с. муус устар 12 күнүгэр диэри болдьохтоох табаар бэлиэтэ регистрацияны ааспыт. Ити бэлиэ Тута аатынан быһах, таҥас-сап оҥорон атыылыыр, араас угуйугу, кэмиэрчэскэй өҥөнү тэрийэр түөкүннэртэн харыстыыр аналлаах.
“Дьиҥ таһымнаахтык бигэргэммит табаар бэлиэтэ – Дьоруой нэһилиэстибэтин уонна аатын-суолун суобаһа суохтук туһанартан харыстыырга дьоһун хардыы. Биһиги Андрей Николаевичка көмөлөспүппүтүттэн астынабыт”, - диэн департамент салайааччыта Михаил Пан этэр.
