СӨ гражданскай оборуонаҕа уонна олоххо куттал суох буолуутун хааччыйыыга миниистирэ Дмитрий Лепчиков этэринэн, бу күннэргэ өрөспүүбүлүкэ уматыгы атыылыыр, тиэйэр-таһар улахан тэрилтэлэри кытта уматык кээмэйин элбэтэргэ уһун кэмнээх дуогабардары түһэрсибит. Авиация уматыгын аҕалтарар сөбүлэҥи уһаппыттар. Ону тэҥэ тимир суол тиэхиньикэтин сэлээркэнэн хааччайарга сирэй сөбүлэһиигэ илии баттаспыттар.
РФ энэргиэтикэҕэ министиэристибэтин өйөбүлүнэн, Саха сирин уматыгынан хааччыйар тэрилтэлэрэ ньиэп бородуукталарынан хааччыларга сирэй дуогабардары түһэрсэргэ бэлэмнэнэллэр.
Мантан сайын от үлэтин уонна күһүн хомуур кэмигэр биир бастакынан уматык тыа хаһаайыстыбатын үлэһиттэригэр тиийиэхтээх. Кинилэр уматыгы ураты бэрээдэгинэн ылыахтаахтар: бигэргэммит лимиитинэн, биир куттууга хааччаҕа суох. Тэрилтэлэр уонна кэпэрэтииптэр уматыгы сирэй дуогабарынан ылар буоллахтарына, бааһынайдэр уонна кэтэх хаһаайыстыбалар – олохтоох дьаһалта нөҥүө сайаапканан. Бэнсиини-сэлээркэни буочукаларга-канистраларга эмиэ куталлар.
Санаттахха, Ил Дархан Айсен Николаев дьаһалынан өрөспүүбүлүкэҕэ уматык суһал ыстааба тэриллибитэ, салайааччынан бырабыыталыстыба бэрэссэдээтэлин солбуйааччы Дмитрий Садовников анаммыта. Ыстаап балаһыанньа көнүөр диэри үлэлиэхтээх.
