Эдьигээн улууһугар Үөһээ Бүлүүттэн тиийэн үлэлии сылдьыбыт десантник-баһаарынай өллө. Ол туһунан СИА-ҕа суһал сулууспаттан иһитиннэрбиттэр. Эр киһи сүрэҕэ тохтообут буолуон сөп.
“Сорудахха сылдьан кэлбиттэр уонна палааккаларыгар киирэн утуйбуттар. Сарсыарда биир киһи уһуктубатах. Сабаҕаланарынан, сүрэҕэ тохтообут. Эдэр киһи. Өлүөхсүтү от ыйын 5 күнүгэр бөртөлүөтүнэн Эдьигээн бөһүөлэгэр аҕалбыттар. Криминалист-эксперт кэлэрин күүтэллэр”, – диэн суһал сулууспа үлэһитэ сырдаппыт.
Кини этэринэн, “Авиалесоохрана” Үөһээ Бүлүүтээҕи салаатыттан парашютнай-десантнай баһаарынай сулууспа 24 үлэһитэ Эдьигээн улууһугар от ыйын 4 күнүгэр тиийбит.
Эдьигээҥҥэ ойуур баһаардарынан сибээстээн улуус таһымнаах ыксаллаах быһыы-майгы биллэриллэн турар. Уоту умулларарга Сангаартан, Үөһээ Бүлүүттэн, Бүлүүттэн, Ньурбаттан уонна Тааттаттан сүүстэн тахса киһи тиийэн үлэлии сылдьар. Баһаар иэнэ – 150 гааттан тахса.
