19-с төгүлүн ыытыллыахтаах олоҥхо ыһыаҕын тэрээһинэ силигин ситтэ, кэбээйилэр ыалдьыттары көрсөргө бэлэмнэр.
Ил Дархан Айсен Николаев быһаарбытынан, Кэбээйи Кэбээйитигэр ыһыллар быйылгы Олоҥхо ыһыаҕа Олоҥхо үһүс уон сылын арыйар бастакы улахан тэрээһин буолуохтаах. Уһун Хонуу диэн сиргэ тутуу үлэтэ бүтүннүү түмүктэммит. Руслан Тараховскай режиссердаах айар кэлэктиип күнүстэри-түүннэри тэрээһин арыллыытыгар бэлэмнэнэр.
“Ыһыах арыллыытыгар 1000-тан тахса киһи кыттыаҕа. Бу Кэбээйи улууһугар ыытыллар өрөспүүбүлүкэ таһымнаах бастакы улахан тэрээһин. Улуус бары нэһилиэктэриттэн оҕотуттан саҕалаан оҕонньоругар тиийэ үтүө көмөһүттэр уонна көхтөөх дьон кэлэн, үлэлии-хамсыы, көмө-ньыма буола сылдьар. Дьон бу ыһыаҕы өр уонна өрө көтөҕүллэн күүппүтэ”, – диэн култуура миниистирэ Афанасий Ноев сырдатта.
Ыһыах чэрчитинэн барыта 40-тан тахса араас куонкурус-күрэх ыытыллыахтаах: олоҥхоһуттар, оһуокайдьыттар, тута хоһуйааччылар, тойуксуттар, ырыаһыттар, чабырҕахсыттар, күрэсчиттэр, о.д.а. күөн көрсүөхтээхтэр.
Ыһыах кэмигэр “Эпосы народов мира” диэн ЮНЕСКО норуоттар икки ардыларынааҕы бырайыага сүрэхтэниэхтээх. Башкортостантан, Хакасияттан, Тываттан, Алтаайтан, Казахстантан уонна Кыргыстаантан ыалдьыттар кэлиэхтээхтэр.
