От ыйын 1 күнүгэр, СӨ Национальнай бэчээтин күнүгэр, бырабыыталыстыба бэрэссэдээтэлэ Кирилл Бычков суруналыыстарга судаарыстыбаннай наҕараадалары туттарда.
“Бүгүн биһиги судаарыстыбаннай наҕараадалары суруналыыстыка диэн төрөөбүт дойду туһугар сулууспалааһын буоларын дьиҥ үлэнэн дакаастаабыт дьоҥҥо туттарабыт. Информацияны киэҥник тарҕатар сириэстибэлэр кылааттарын киһи сыаналыыра уустук. Эһиги репортажтаргыт, ыстатыйаларгыт, устар сюжеттаргыт аныгы Саха сирин летопиһа буолаллар. Бу наҕараадалар эһигини саҥа чыпчаалларга сирдээтиннэр. Үлэҕит-хамнаскыт, сыраҕыт-сылбаҕыт дьон сүрэҕэр тиийэ туруохтун”, – диэн К.Бычков эҕэрдэлээтэ.
Быйыл В.В. Никифоров-Күлүмнүүр аат. судаарыстыбаннай бириэмийэни “Саха” НКИХ Дарья Ермолаева салайааччылаах “Хранители времени” документальнай бырайыагын устубут айар бөлөххө туттардылар.
Биһиги тэрилтэбит, “Ситим” медиа-бөлөх”, үпкэ-харчыга дириэктэрэ Сахаяна Филиппова “Гражданскай килбиэн” бэлиэнэн наҕараадаланна. “Саха сирэ” хаһыат эрэдээктэрин солбуйааччыта Анивера Акимова Ил Дархан кыраамататын тутта. Ил Дархан оҕо литэрэтиирэтигэр бириэмийэтин бэйиэт, оҕо суруйаачыта, Саха сирин суруйааччыларын сойууһун эппиэттиир сэкирэтээрэ Зинаида Архиповаҕа биэрдилэр.
Оттон Саха сирин үтүөлээх суруналыыһа бочуоттаах ааты “Саха” НКИХ генеральнай дириэктэрин информационнай бэлиитикэҕэ солбуйааччыта Ирина Ефимоваҕа иҥэрдилэр.
Бүгүҥҥү туругунан, Саха сиригэр дьиҥ таһымнаах регистрациялаах 201 информацияны киэҥник тарҕатар сириэстибэ баар. Онтон төрөөбүт тылынан тахсааччыта – 80. Кэлиҥҥи сылларга интэриниэт таһаарыы эбиллэн, 85 буолбут. Онтон 30 саайта-портала сахалыы уонна хотугу аҕыйах ахсааннаах норуоттар тылларынан суруллар.
