2026 с. Туймаада ыһыаҕар икки күн устата, бэс ыйын 27 уонна 28 күннэригэр, барыта 230-тан тахса тыһыынча киһи сырытта. Кэлиҥҥи сылларга Дьокуускай ыһыаҕар бачча элбэх киһи сылдьыбыта суоҕа.
Быйылгы ыһыах Арассыыйаҕа Норуоттар сомоҕолоһууларын уонна Саха Сиригэр Култуура сылларыгар ананна. 20 түһүлгэнэн барыта 100-тэн тахса араас тэрээһин буолла.
Ыһыах арыллыытыгар, алгыс түһүүтүгэр, трибуналарга уонтан тахса тыһыынча киһи муһунна. Сиэргэ-туомҥа уонна тыйаатырдыы дьүһүйүүгэ 800-тэн тахса оҕо-ыччат, улахан дьон, култуура-итэҕэл үлэһитэ уонна 18 айар кэлэктиип кытынна.
“Дыгын оонньуулара” дэгит күрэһи түһүлгэҕэ бэйэтигэр эмиэ уонунан тыһыынча киһи туран-олорон көрдө. Кэбээйи бөҕөһө Артем Дьяконов бастаата. Иккискэ Яков Дмитриев таҕыста. Павел Друзьянов үһүс буолла.
