Өлүөнэ күргэтин тутааччылара коффердам түһүөхтээх сиригэр өрүс сүнньүн дириҥэтэн эрэллэр. Санаттахха, бу иннинэ коффердамы хаҥас кытылтан уҥуор состорон таһааран, дьаакырынынан иҥиннэрбиттэрэ.
Дириҥэтэр үлэҕэ “Якутск” хампаанньа тэхиньиичэскэй флота үлэлии сылдьар. Уопсайынан, күргэни тутууга барыта араас кыамталаах 15 суудуна туһаныллыахтаах.
“Айылҕалыын, үлэлиин-хамнастыын ураты тутуу. Холобур, бастакы коффердамы өрүс сүнньүгэр киллэрэрбитигэр 120 киһи тэҥинэн үлэлээбитэ. Урут Арассыыйаҕа итинник холобур суоҕа. Тутууга “ВИС” бөлөҕү таһынан “МОРБАЗА-Маринерус” холдинг уонна “Якутск” судоходнай хампаанньа исписэлиистэрэ үлэлии сылдьаллар”, – диэн дьиҥ таһымнаах иһитиннэриигэ суруллар.
Быйыл Ил Дархан Айсен Николаев ПМЭФ-2026 тэрээһинигэр сылдьан Өлүөнэ күргэтин 2029 сылга арыйыахпыт диэн турар.
