Ил Дархан Айсен Николаев үлэтинэн Донецкайдааҕы норуодунай өрөспүүбүүкэҕэ тиийэ сылдьан АБДь ыытылла турар сиригэр байыаннай сорудаҕы толоро сылдьар биир дойдулаахтарбытын көрүстэ. Байыастары кытта инники кирбии балаһыанньатын, хааччыллыы боппуруоһун туһунан кэпсэттэ, илдьэ барбыт саҥа тиэхиньикэлэрин туттарда.
“Байыастарга өссө биир баартыйа байыаннай-тэхиньиичэскэй сириэстибэни туттардым: “ЯК-14” сиринэн сылдьар роботизированнай платформалары, пилота суох көтөр аппарааттары, сибээс сириэстибэлэрин, “Сокол” квадроцикыллары уо.д.а. наадалаах тэрили. Онно Саха сирин тирэх пууна улахан сүрүннүүр, иилиир-саҕалыыр үлэни ыытар, подразделениелары кытта үлэлэһэр, байыастарбытыгар суһал көмөнү тиэрдэр”, – диэн Айсен Николаев “Макска” ханаалыгар суруйбут.
Ил Дархан анал байыаннай дьайыы кыттыылаахтарын, бэтэрээннэрин уонна кинилэр дьиэ кэргэннэрин өйөбүлэ былаас үлэтин биир саамай улахан суолталаах хайысхата буоларын санатта. “Бу уопсай дьыала туһугар кылааттарын киллэрэ сылдьар тирэх пуун үлэһиттэригэр, үтүө көмөһүттэргэ, тэрилтэлэргэ уонна бары үтүө санаалаах Саха сирин олохтоохторугар махталбын тиэрдэбин. Бу биһиги байыастарбытыгар улахан суолталаах дьыала инникитин даҕаны салҕана туруо”, – диир Айсен Николаев.
