БКЭ алын бааллара икки таһымҥа арахсаллар: аттестат ыларга уонна үрдүк үөрэх кыһаларыгар киирэргэ.
Оскуола оҕолоро быйыл аттестат ылалларыгар нуучча тылыгар 24 баалтан итэҕэһи суруйуо суохтаахтар, оттон базовай таһымнаах математикаҕа сэттэ баалы (эбэтэр "үс" сыананы) ылыахтаахтар диэн РИА Новости сенатор Айрат Гибатдиновка ыйан суруйар. Атын предметтэргэ эмиэ алын боруогу олохтоотулар. Сенатор этиитинэн, БКЭ алын бааллара икки таһымҥа арахсаллар: аттестат ыларга уонна үрдүк үөрэх кыһаларыгар киирэргэ.
Бырагыраамманы толору баһылаабытын туоһулуур курдук физикаҕа, химияҕа уонна биологияҕа 36 баалы ылыахха наада, профильнай математикаҕа – 27, информатикаҕа – 40, устуоруйаҕа – 32, географияҕа – 37, обществознаниеҕа – 42, литератураҕа – 32, омук тылларыгар – 22 баал ирдэнэр.
Гибатдинов бэлиэтээбитинэн, алын боруогу ааһыы төлөбүрдээх үөрэххэ да киириини мэктиэлээбэт – үрдүк үөрэх кыһатын иһигэр куонкурус ыытыллар. Кини үрдүк үөрэх кыһалара тус ситиһиилэр иһин 15 эбии баалга тиийэ эбиэхтэрин сөбүгэр болҕомтону уурда: туйгун аттестат, ГТО кыһыл көмүс бэлиэтэ, волонтерство (түөрт сылтан итэҕэһэ суох уопут), олимпиадаларга кыайыылар. Үксүн хас биирдии ситиһии биэс баалтан элбэҕи биэрбэт, ол эрэн чопчу ахсааны үрдүк үөрэх кыһата бэйэтэ олохтуур. Үрдүк куонкурус усулуобуйатыгар бу бааллар бюджетнай миэстэҕэ киириигэ быһаарар суолталаах буолаллар.
Бэй.кэр.
Хаартыска: Рамиль Ситдиков / РИА Новости, 11-с кылаас үөрэнээччитин БКЭ саҕаланыан иннинээҕи пааспара. Архыыптан
