2017 с. тохсунньу 1 күнүгэр диэри “хаарбах туруктаах” диэн билиниллибит дьиэлэртэн 2027 с. бүтүөр диэри 6 тыһыынча киһи саҥа дьиэҕэ көһүө. Ол туһунан тутуу миниистирэ Виктор Романов СИА-ҕа кэпсээтэ.
Кини этэринэн, өрөспүүбүлүкэ Территория сайдыытын пуондатыгар тиийэн сайаапкатын көмүскээбит, онон федеральнай киинтэн быйыл хаарбах дьиэни көтүрэргэ 12,5 миллиард солкуобай кэлэр буолбут.
“2026-2027 сс. барыта 116 тыһыынча квадратнай миэтэрэ иэннээх хаарбах дьиэ көтүллүөхтээх. Онно барыта 6190 киһи олорор. Даҕатан эттэххэ, ити дьон ааспыттааҥҥы бырагыраама харчыта тиийбэккэ, эрдэ кыайан көспөккө хаалбыттара. Онон 2027 с. бүтүөр диэри 2017 с. тохсунньу 1 күнүгэр диэри хаарбах туруктааҕынан билиниллибит дьиэлэр бары көтүрүллүөхтээхтэр”, – диэн Виктор Романов сырдатта.
Миниистир эбэн эппитинэн, уопсайынан, 2019-2025 сс. Саха сиригэр барыта 54 тыһыынчаттан тахса киһи хаарбах дьиэттэн саҥа дьиэҕэ көспүт.
