Гидомет-киин Саха сиринээҕи салаата иһитиннэрэринэн, бу саас өрөспүүбүлүкэ алта өрүһэ халаанныыра, уу нуорма таһымын куоһарара күүтүллэр. Ол – Дьааҥыга, Халымаҕа, Алаһыайга, Индигииргэ, Мархаҕа уонна Майдаҕа. Нуорматтан намыһах уу Аммалаах Анаабырга кэлэрэ сылыктанар. Атын өрүстэргэ орто уу кэлиэ диэн буолар.
Быйыл өрүстэр урукку курдук кэмигэр эбэтэр 3—5 хонук эрдэлээн эстиэхтэрэ. Кыралаан харыахтара. Ол гынан баран, күн-дьыл туруга мөлтөөтөҕүнэ, улахан муус харан намыһах сирдэри уу ылыан сөп.
Өрүстэр маннык сирдэргэ харыахтарын сөп: Өлүөнэ өрүскэ – Хаҥалас улууһуттан Алдан төрдүгэр диэри; Алдаҥҥа – Уус Майда таһынан; Халымаҕа – Үөһээ уонна Орто халымалар тастарыгар.
Өрүстэр барыллаан эстэр күннэрин бүтэһиктээх билгэтэ муус устар 16 күнүгэр тахсыаҕа. Бу күннэргэ СӨ гражданскай оборуонаҕа уонна олох-дьаһах куттала суох буолуутугар министиэристибэтэ өрөспүүбүлүкэ улуустара халааҥҥа төһө бэлэмнэрин көрөр-истэр. Муус устар 9 күнүнээҕи туругунан, 21 улууска бэрэбиэркэ ыытыллыбыт. 12 түгэнинэн административнай дьыала көбүтүллэн, кэһиини туоратарга дьаһал суруллубут. 15 муниципальнай тэриллиигэ бэрэбиэркэ салҕанар.
