Быйыл Саха сирин исписэлиистэрэ Докучаевскай куоракка 11 эбийиэги чөлүгэр түһэриэхтэрэ. Билигин былааҥҥа киирбит сэттэ эбийиэккэ 80 киһи уонна 6 тиэхиньикэ үлэлии сылдьар. Ол туһунан Саха сириттэн барбыт үлэлиир бөлөх салайааччыта Анатолий Алексеев РФ бырабыыталыстыбатын бэрэссэдээтэлин солбуйааччыта – бэрэсидьиэн Уһук Илиҥҥэ боломуочуйалаах бэрэстэбиитэлэ Юрий Трутневка дакылаттаабытын “Саха.гов.ру” сырдатар.
Бу күннэргэ тойон Трутнев Докучаевскайга сылдьан өрөмүөннэрэ түмүктэнэн эрэр Оҕо айымньытын дьиэтигэр уонна Ыччат киинигэр сырытта. Биһиги исписэлиистэрбит дьиэлэр эркиннэрин, сарайдарын төрдүттэн уларытан оҥорбуттар, түннүктэрин уларыппыттар, ситимнэрин саҥардыбыттар, ис-тас барааннарын тупсарбыттар. Дьиэ уонна киин коммуникациялара тардыллара, миэбэллэрэ таҥыллара, тиэргэннэрин бөҕө-саҕа хомуллара хаалбыт. Уопсайынан, үлэ-хамнас 96%-на түмүктэммит. Анатолий Алексеев этэринэн, эбийиэктэр муус устарга толору бэлэм буолуохтаахтар.
Юрий Трутнев Дьокучаевскайга киирсэр Еленовка бөһүөлэк 2-с №-дээх оскуолатыгар эмиэ сырытта. Оскуола дьиэтэ үйэ аҥаарын анаараа өттүгэр тутуллубут, Украина сэбилэниилээх күүстэрин ытыалааһынын кэннэ күүскэ эмсэҕэлээбит. Былырыын оскуола түннүктэрин, сарайын уларыппыттар. Быйыл толору хапытаалынай өрөмүөн саҕаламмыт.
“Еленовка оскуолатын ахсынньыга диэри бүтэриэхтээхпит эрээри, оҕолор төһө кыалларынан оскуолаларыгар эрдэ киирэ охсуохтарын баҕарабыт. Онон сэтинньигэ диэри бүтэ охсубут киһи диэн былаанныыбыт”, – диир Семенов.
Уопсайынан, билигин Докучаевскайга ИТ-кииннээх Ыччат киинэ, Андреевка бөһүөлэгэр духуобунай сайдыы киинэ, уу ситимэ, икки суол оҥоһулла тураллар. Эбийиэктэри барытын докумуонунан бодьоммут кэмин иннинэ чөлүгэр түһэрэ охсорго тиэтэйэллэр. Итини таһынан, Саха сириттэн барбыт быраастар үлэлии сылдьаллар. Быйыл сыл саҕаланыаҕыттан барыта 42 араас эпэрээссийэни оҥорбуттар.
