Бу сайын Саха сиригэр 120 тыһыынчаттан тахса оҕо доруобуйатын чэбдигирдиэ. Ол туһунан “Сосновай Бор” сынньалаҥ уонна чэбдигирии киинин дириэктэрэ Варвара Васильева иһитиннэрдэ.
“Хас биирдии оҕо сайыҥҥы сынньалаҥын куттала суоҕун сэргэ туһалаах, интэриэһинэй уонна чаҕылхай оҥорор соруктаахпыт. Үүнэр дьылга 500 сынньалаҥ уонна чэбдигирдэр киин арыллыахтаах, онно 50 тыһыынчаттан тахса оҕо сылдьыаҕа. 10-тан тахса тыһыынча оҕо өрөспүүбүлүкэ таһыгар барыаҕа. Ону сэргэ өссө 50 тыһыынча кэриҥэ оҕо сайыҥҥы оскуолаларга, араас тэрээһиннэргэ, түһүлгэлэргэ сылдьыаҕа. Ураты болҕомто куорат таһынааҕы лааҕырдарга ууруллуо. Холобур, Дьокуускай “Энергетик” лааҕырыгар бу сайын түөрт аныгы куорпус оҥоһуллан, 200 оҕо эбии сылдьар буолуо. Уопсайынан, оҕо лааҕырдарын саҥардар үлэ тиһиктээхтик ыытыллар. Ол курдук, 2024—2025 сс. федеральнай бырагырааманан Дьокуускай “Спутник” лааҕырыгар алта саҥа куорпус уонна Мэҥэ Хаҥаласка “Илгэ” лааҕыр тутуллубуттара. Ол түмүгэр 900 эбии миэстэ тахсыбыта.
Оҕолор өрөспүүбүлүкэ таһыгар эмиэ сынньаналлар. “Артек”, “Океан”, “Орленок” уонна “Смена” федеральнай кииннэргэ ыытыахпыт, быйыл 600-тэн тахса квота көрүллүбүтэ. Ону таһынан 300-тэн тахса оҕо Приморье кыраайыгар “Алые паруса” лааҕырга сынньаныаҕа. “Кыра ороскуоттаах сынньалаҥ”, “Тиэргэн баһаатайа”, “Саха сирин баһаатайын мэтириэтэ” бырайыактар эмиэ салҕаныахтара. Туспа хайысха быһыытынан профориентация уонна улаатан эрэр обургу оҕолору үлэҕэ ылыы үлэлиэхтэрэ”, – диэн Варвара Васильева кэпсиир.
Варвара Васильевана эппитинэн, оҕо лааҕырдарыгар суруйтарыы “Госуслуги” порталга ыам ыйын 15 күнүттэн саҕаланыа. Төрөппүттэр сайабылыанньаны ыытарга эрдэттэн бэлэмнэниэхтэрин наада. Анал байыаннай дьайыы кыттыылаахтарын оҕолоро путевкаҕа уочарата суох тиксиэхтэрэ. Лааҕыр боппуруоһунан 8 800 550-14-21 нүөмэргэ эрийэн билсиэххэ сөп
.
Бэй.кэр.
Хаартыска: СИА.
