Өрөспүүбүлүкэ нэһилиэнньэтин С гепатикка чинчийэр үлэ салҕанар. Сыл саҕаланыаҕыттан 25 сааһыттан аҕа саастаах 51 045 киһиттэн С гепатит анаалыһын ылбыттар (скрининг чинчийиитэ). Ааспыт икки ый иһигэр хроническай гепатиттаах 61 саҥа ыарыһаҕы булбуттар. Ол туһунан СӨ доруобуйа харыстабылын министиэристибэтэ иһитиннэрэр.
Уорбаланар эбэтэр ыарыылаах дьон көһүннэҕинэ, толору чинчийиигэ ыыталлар уонна ол түмүгүнэн көрөн, вируһу бохсор эми-тому аныыллар.
“2025 сыл түмүгүнэн Саха сиригэр диспансер кэтээн көрүүтүгэр 3 934 хроническай гепатиттаах киһи учуокка турар. Ыарыһахтар бары кэлимник эмтэнэллэр, быраастар кэтээн көрөллөр. Нэһилиэнньэ ортотугар маннык чинчийии ыытыллара олус улахан суолталаах”, – диэн СӨ доруобуйа харыстабылан миниистирэ Елена Афанасьева кэпсиир.
Санаттахха, С гепатит скрининин киһи олорор сиригэр балыыһаҕа диспансеризация уонна мэдиссиинэ көрүүтүн кэмигэр барыта босхо туттарыан сөп.
