Муус устар 1 күнүттэн саҕалаан Саха сиригэр муус суолунан сылдьар массыыналар уйуктарын сыыйа кыччатан барыахтара. Оттон 15 чыыһылаттан суол барыта кэриэтэ сабыллыаҕа.
“Бүлүү” упрдор салайар “Бүлүү” уонна “Халыма” айан суолларыгар муус устар 1 күнүттэн туоруур массыына уйугун 30 туоннаҕа диэри, оттон муус устар 8 күнүттэн – 20 туоннаҕа диэри кыччатыахтара. Суол барыта ити ый 15 чыыһылатыгар сабыллара былааннанар. Ол иһигэр Дьокуускай – Аллараа Бэстээх хайысханан, Бүлүү өрүһү туоруур түөрт суол уонна Алдаҥҥа.
Биллэн турар, кыһыҥҥы айан суоллара чопчу сабыллар болдьохторун күн-дьыл уонна халлаан туруга эрэ быһаарар кыахтаар.
Санаттахха, суол сабыллан турар кэмигэр туораабыт биирдиилээн дьон сүүһүнэн тыһыынча, оттон дуоһунастаах дьон уонна юридическай сирэйдэр мөлүйүөнүнэн солкуобайга ыстарааптаныахтарын сөп. Оннук холобуру бу күһү көрөн-истэн турабыт, дьону туораппыт Таатта таксиһын “ыал устун ыыппыттара”.
