Кулун тутар 19 күнүгэр Чурапчы улууһун Болтоҥо нэһилиэгин оскуолатыгар СӨ биллиилээх судаарыстыбаннай диэйэтэлэ, номоххо киирбит кыһыл хамандыыр, чекист, Саха сирин Киин Ситэриилээх кэмитиэтин бэрэссэдээтэлин солбуйааччы, Саха сиринээҕи доруобуйа харыстабылын наркома Николай Дмитриевич Кривошапкин–Уот Субуруускай 130 сылыгар анаммыт «Сугулаан-2026» ыччат форума үрдүк таһымҥа ааста. Форум Чурапчы улууһун баһылыга Степан Саргыдаев, СӨ ыччат дьыалатыгар уонна социальнай коммуникацияҕа миниистирэ Петр Шамаев, СӨ инновацияҕа миниистирэ Петр Николаев уонна СӨ уопсастыбаннай палаататын өйөбүллэринэн ыытылынна.
Манна улууспут нэһилиэктэриттэн эдэр, кэскиллээх ыччат лиидэрдэрэ, оскуола улахан кылааһын үөрэнээччилэрэ, актыбыыстара, араас үөрэх тэрилтэлэрин устудьуоннара, ону тэҥэ Дьокуускайтан эспиэрдэр кэлэн кытыннылар. Ол курдук, «СмартОм» ИТ сыһыарыылары уонна саайтары оҥорор хампаанньа генеральнай дириэктэрэ Максим Михайлов, АКУИККИ преподавателэ, «Суруйааччылар алаастарынан» уонна «Урбаанньыттар алаастарынан» маршруттар ааптардара Александр Протодьяконов, «Steam», «VK play» платформаҕа көмпүүтэр оонньууларын оҥорор «Криолит геймс» хампаанньа салайааччыта Валерий Крупеньков, Чурапчы улууһун баһылыгын социальнай боппуруостарга солбуйааччы Мария Кронникова, Н.Д. Субуруускай аат. Болтоҥо орто оскуолатын дириэктэрэ Владислав Скрябин, Чурапчы улууһун үөрэҕин салалтатын начаалынньыга Лилия Пермякова, Чурапчы улууһун олохтоох көҕүлээһини сайыннарар ааҕыныстыбатын үлэһитэ Саргылаана Старостина ыалдьыттаатылар.
Кэлбит ыччаттар 8 хамаандаҕа арахсан, куураатардар ананнылар. Кыттааччыларга Чурапчы (ЦСППЕИМ, гимназия, Хатылы, «Березка» уһуйаан) психологтара биир сомоҕо буоларга араас оонньууну, тренини ыыттылар.
Хамаандалар талан ылбыт тиэмэлэригэр креативнай экэниэмикэҕэ сыһыаннаах бырайыактары оҥордулар, эспиэрдэр иннилэригэр көмүскээтилэр.
Түмүккэ 3 хамаанда кыайыылааҕынан тахсан наҕараадаланна, ону тэҥэ анал ааттар туттарылыннылар. Сандаара Ефремова салайааччылаах бастаабыт хамаанда “Туризм без границ” бырайыага биһирэнэн, муниципальнай бырагыраамаларга, куонкурустарга кыттарга эспиэрдэ сүбэлэрин ылла.
Бу күнү лууспут ыччаттара бэйэлэригэр саҥа билиини, сонун көрүүлэри иҥэриннилэр. Бары үлэлэспит, көмө-тирэх буолбут дьоммутугар махталбытын биллэрэбит.
Тэрийэр бөлөх.
