Бырабыыталыстыба бэрэссэдээтэлин солбуйааччы Сергей Местников Кэбээйи улууһугар тиийэн Олоҥхо ыһыаҕын тэрээһинин туһунан мунньахтаата. Быйыл Олоҥхо үһүс онус сылын арыйар бастакы ыһыах от ыйын 4–5 күннэригэр Кэбээйи Кэбээйитигэр Уһун Хонуу диэн сиргэ ыһыллыахтаах.
“Кэбээйи олус баай култууралаах, кэрэ айылҕалаах улуус. Манна хотугу аҕыйах ахсааннаах омуктар бэрэстэбиитэллэрэ – эбээннэр – култуураларын, үгэстэрин, тылларын кичэллээхтик харыстаан олороллор. Соторутааҕыта Сэбээн Күөлгэ сылдьыбытым. Оскуола да оҕолоро, улахан да дьон бэйэлэрин икки ардыгар эбээннии кэпсэтэллэр. Онон мин Олоҥхо ыһыаҕын түһүлгэтигэр саха да, эбээн омук да култуураларын көрдөрүөхтэрэ диэн эрэнэбин”, – диэтэ Сергей Васильевич.
Тэрээһини, сиэри-туому, куонкурустары, успуорт күрэхтээһиилэрин ыытар регламеҥҥа киирбит 15 эбийиэк тутуллуохтаах. Бу күннэргэ тутуу маһа барыта бэлэмнэнэн, Кэбээйигэ диэри тиэрдиллибит. Матырыйаал сүрүн өттө атыылаһыллыбыт. Билигин араас тимир каркааһы тиэйэ сылдьаллар, эбийиэктэр ойуулуур-дьүһүннүүр элэмиэннэрин оҥороллор.
Былаан быһыытынан, Олоҥхо ыһыаҕын арыллыытыгар барыта 1,5 тыһыынча кэриҥэ киһи кыттыахтаах. Ол иһигэр судаарыстыбаннай тыйаатырдар бары кэлэктииптэрэ, ыаллыы сытар Нам, Горнай, Үөһээ Бүлүү уонна Бүлүү улуустарын култуураларын үлэһиттэрэ бааллар. Ыһыахха 120 үтүө көмөһүт (волонтер) кыттыаҕа.
