Быйылгы туругунан, Саха сиригэр хроническай С гепатиттаах дьон учуотугар 3934 киһи турар. 2025 сыллаахха вируһу утары охсуһар терапиянан 1218 киһи хааччыллыбыт. Онно анаан федеральнай киинтэн, өрөспүүбүлүкэ бүддьүөтүттэн уонна булгуччулаах мэдиссиинэ страховкатыттан үп көрүллүбүт. Эмтэнии көдьүүһэ 99,2%-ҥа тиийбит.
Өрөспүүбүлүкэҕэ “Көхтөөх уһун үйэлэнии” национальнай бырайыак чэрчитинэн “С гепатиты утары охсуһуу” федеральнай бырайыак үлэлиир. Ол чэрчитинэн ыалдьыбыт дьону көрдүүллэр уонна вируһу утары охсуһар үлэ тэриллэр.
Хонтуруоллуур чинчийии түмүгэ көрдөрөрүнэн, 2025 с. ыарыһах 99,2%-на көдьүүстээхтик эмтэммит. Ааспыт сыл иһигэр 25 уонна онтон аҕа саастаах 49 863 киһини С гепатикка чинчийбиттэр.
СПИД киин исписэлиистэрэ С гепатиттан сэрэхтээх буоларга маннык суоллары санаталлар:
– Косметология процедуратын оҥорторорго, татурировканы уруһуйдатарга, пирсини ииллэрэргэ, о.д.а. өҥөнү анал көҥүллээх, идэтийбит үлэһиттэрдээх эрэ тэрилтэҕэ сылдьыллыахтаах;
– Дьиэҕэ-уокка дьиэ кэргэн хас биирдии чилиэнэ бэйэтэ туспа бирииппэлээх, тиис суунар суоккалаах, соттордоох, аһыыр иһиттээх, о.д.а. буолуохтаах;
– Эр киһилиин-дьахтардыын сылдьыһарга харыстыыр сириэстибэ туһаныллыахтаах;
– Оҕолонуох иннинэ эр киһи да, дьахтар да доруобуйатын толору чинчийтэрэрэ ордук;
– Диспансеризация уонна мэдиссиинэ көрүүтүн кэмигэр С гепатит скрининин мэлдьи туттарыллыахтаах.
Хаартыска: Yakutia24.ru
