2025 сыллаахха СӨ Дьарыктаах буолуутун киинигэр 15 тыһыынчаттан тахса киһи үлэ көрдөөн тиийэ сылдьыбытыттан, 9000 кэриҥэ киһиэхэ үлэ булан биэрбиттэр.
Ол туһунан Дьарыктаах буолуу судаарыстыбаннай кэмитиэтин бэрэссэдээтэлэ Светлана Горюшинская кэпсээтэ. Кини этэринэн, “Каадырдар” национальнай бырайыак сүрүн көрдөрүүлэрэ ситиһиллибит.
“Ити бырайыак чэрчитинэн дьону үөрэттэрдибит, нэһилиэнньэ ураты араҥатыгар киирэр дьон үлэ булалларыгар көмөлөстүбүт, кэлин ханнык идэлэр наада буолуохтарын билгэлээтибит. Үлэбит 2026 сылга эмиэ салҕаныаҕа”, – диэн хотун Горюшинская этэр.
“Каадырдар” национальнай бырайыак 2025 сыл тохсунньу 1 күнүттэн саҕаламмыта. Сүрүн соруга – тиийбэт исписэлиистэри бэлэмнээһин, үөрэх тиһигин экэниэмикэ ирдэбилиниин дьүөрэлэһиннэрии.
С.Горюшинская өссө “Үлэлиир Саха сирэ. Каадырдар” диэн биэдэмистибэ тус бырайыагын туһунан сырдатта. Бу бырайыак Ил Дархан Айсен Николаев ыйааҕынан саҕаламмыта. Ол чэрчитинэн, 2025 сыллаахха 6574 выпускник үлэ булбут (былырыыҥҥыттан 803 киһинэн элбэх). Ол иһигэр үөрэммит идэлэринэн үлэни булуу элбээбит – 5031 киһи буолбут.
Идэлэринэн үлэни ордук мэдиссиинэ үөрэҕин кыһатын бүтэрбиттэр булаллар эбит – выпускниктар 74%-нара.
Хаартыска: sakhaparliament.ru
