Ил Дархан Айсен Николаев көҕүлээһининэн, кулун тутар 14 күнүгэр АЛРОСА Накыыннааҕы учаастагар көстүбүт 73,16 караттаах алмааска Иннокентий Тарбаахап аатын иҥэрдилэр. Биллиилээх асчыт 1944 сыл кулун тутар 8 күнүгэр Таатта улууһун Аллараа Амма нэһилиэгин Чычымах сэлиэнньэтигэр төрөөбүтэ.
Бырабыыталыстыба бэрэссэдээтэлин солбуйааччы Сергей Местников РФ маастар-повара, РФ эргиэнин, норуот хаһаайыстыбатын үтүөлээх үлэһитэ, А.Е. Кулаковскай бириэмийэтин лауреата, Саха сирин бочуоттаах олохтооҕо Иннокентий Тарбаахапка 80 сааһын бэлиэтиир үөрүүлээх мунньахха алмаас копиятын туттарда. Кини Иннокентий Иннокентьевич саха төрүт култууратыгар, саха омук сайдыытыгар сүдү суолталааҕын бэлиэтээтэ.
Тэрээһин кыттыылаахтарыгар Ил Дархан сүбэһитэ Георгий Никонов салайыытынан уһуллубут «Асчыт буолар дьылҕам (Судьба быть поваром)» диэн документальнай киинэни көрдөрдүлэр. Манна Оҕо дьиэтигэр иитиллибит тулаайах уолчаан хайдах саха төрүт аһын, куукунатын тилиннэрэр уонна тарҕатар чулуу киһи буолбута көстөр, кэпсэнэр.
Сонун төрдө: CӨ Бырабыыталыстыбатын уонна Ил Дарханын пресс-сулууспата
