Быйыл Арассыыйа Бэрэсидьиэнин быһа тахсыыта уонна улахан пресс-кэмпириэнсийэтэ иккис сылын «Владимир Путины кытта сыл түмүктэрэ» диэн аатынан ахсынньы 19 күнүгэр ыытыллыаҕа. Манна кыттыахтаах суруналыыстар ортолоругар «Сахапечать» тэрилтэ «Индустрия Севера» хаһыатын сүрүн эрэдээктэрэ Елена Проскурина уонна «Якутия 24» телеханаал дириэктэрэ-сүрүн эрэдээктэрэ Марианна Тарасова бааллар.
Елены Проскурина дойду баһылыгыттан Саха сирин инники социальнай-экэнэмиичэскэй сайдыытын туһунан ыйытыахтаах уонна махтаныахтаах. Оттон Марианна Тарасова тугу ыйытарын кистэлэҥҥэ хаалларда. Кини, тэлэбиидэнньэ үлэһитин быһыытынан, бачча улахан таһымнаах пресс-кэмпириэнсийэни хайдах тэрийэллэрин билиэн баҕарарын уонна ыйытыытын көрөөччүлэр интэриэстэринэн салайтаран талыахтааҕын эттэ.
Бэрэсидьиэн быһа тахсыытын олохтоох бириэмэнэн киэһэ 18 ч. 00 мүн. саҕаланыаҕа. Тэрээһини «Первый», «Россия 1», «Россия
24», НТВ, ОТР, «Мир» телеханааллар, «Маяк», «Вести FM» уонна «Радио России» араадьыйа ыстаансыйалара эпииргэ биэриэхтэрэ.
Бэрэсидьиэн аатыгар ыйытыылары билигин даҕаны ыла тураллар. Ону бэрийэргэ дойду устуоруйатыгар бастакытын оҥоһуу өй кыаҕын туһаналлар. 2023 сыллааҕы быһа биэриигэ Владимир Путин 4 чаас 4 мүнүүтэ устата 67 ыйытыыга хоруйдаабыта. Киниэхэ дойду араас муннугуттан барыта 2 мөл. тахса ыйытыы киирбитэ.
Сонун төрдө: CӨ Бырабыыталыстыбатын уонна Ил Дарханын пресс-сулууспата
