Олунньу 17 күнүгэр, Өксөкүлээх Өлөксөй аатынан норуоттар доҕордоһууларын дьиэтигэр, Норуоттар икки ардыларынааҕы төрөөбүт тыллар уон сылларын саҕаланыытын чэрчитинэн, «Эвэды турэн» диэн Эбэҥки тылын күнэ буолла.
Тэрийээччилэр: Саха сиригэр эбэҥки норуотун Ассоцияцията, Өксөкүлээх Өлөксөй аатынан норуоттар доҕордоһууларын дьиэтэ.
Саньытаарынай-эпидемиологическэй хааччахтартан сылтаан, тэрээһин кыттааччылара ZOOM ситиминэн холбоннулар.
Саха сиригэр эбэҥки норуотун Ассоцияцията төрөөбүт тылларын харыстыыр уонна тарҕатар соруктаахтык күүскэ үлэлэһэр. Ол курдук, 2020 сылтан Бэрэсидьиэн гранын пуондата, Арктика сайдыытын уонна СӨ Хотугу норуоттарын дьыалаларыгар министиэристибэтин өйөбүлүнэн, «Эвэды турэткэллу» диэн эбэҥки тылын үөрэтиигэ куурустар ыытыллаллар.
Тэрээһин кэмигэр курсааннар Колесова Светлана Дмитриевна уонна Куличкина Александра Гаврильевна эбэҥки тылынан монологка тылы билиилэригэр таһымнарын көрдөрдүлэр уонна ыытыллыбыт уруоктарга сыанабыл биэрдилэр.
Арассыыйа Федерациятын уонна Уһук Илин төрүт аҕыйах ахсааннаах омуктарын төрүт тылларын уонна литератураларыгар преподавателлэрин Ассоцияцияларын бэрэссэдээтэлэ, Төрүт тыллар федеральнай институттарын Дьокуускайдааҕы филиалын үөрэх литературатын уонна цифровой үөрэтэр ресурстар салааларын сэбиэдиссэйэ Леханова Фаина Матвеевна уонна «Кэскил» өрөспүүблүкэтээҕи оҕо издательствотын дириэктэрин солбуйааччы, пед. наука хандьыдаата Коврова Сардана Егоровна «Би эвэдыт турэчиӊнэм» (Мин эбэҥкилии саҥарабын) диэн оҕоҕо аналлаах эбэҥкилии-нууччалыы тылдьыты сүрэхтээтилэр.
«Эвэдыт турэнчинӊат» куурус салайааччыта, эбэҥки тылын учуутала Петрова Констанция Константиновна билиини-көрүүнү эрчийэр викторинаны ыытта.
Оттон AYANA приложение ааптара Николай Апросимов нууччалыы-эбэҥкилии тылбаасчыт туох саҥа туһалааҕын, кыахтааҕын сүрэхтээтэ.
М.К. Аммосов аатынан ХИФУ норуоттар тылларын институттарын эбэҥки тылыгар үрдүкү сололоох преподавателэ Николаева Надежда Прокопьевна тиэстээх дьыктааны анаалыстаата. Маннык аахсыйа иккис сылын ыытыллар, маныаха дистанционнай фуормалаах буолан, Сибиир уонна Уһук Илин эбэҥкилэрэ эмиэ кыттыыны ыллылар.
Ордук кэтэһилээх түгэнинэн «Аятку улгучэлэн» диэн кэтэхтэн ааҕааччылар күрэхтэрин түмүгүн истии буолла. Бу манна Саха Өрөспүүбүлүкэтин 5 оройуонуттан 54 уонна Сибиир уонна Уһук Илин эрэгийиэннэриттэн икки сайаапка киирбит.
Кыттааччылары үөһэ ахтыллан ааспыт Петрова Констанция Константиновна, Леханова Фаина Матвеевна уонна филология наукатын хандьыдаата, ИГИ ПМНС СО РАН сотруднига Ушницкая Наталья Юрьевна сыаналаатылар.
Өксөкүлээх Өлөксөй аатынан норуоттар доҕордоһууларын дьиэтин пресс-сулууспатын матырыйаалыттан
