Саха өрөспүүбүлүкэтин култуураҕа уонна духуобунаска сайдыытын министиэристибэтин пресс-киинэ иһитиннэрэринэн, быйылгы дьыл балаҕан ыйын 1 күнүттэн, 14 –тэн 22-гэр диэри саастаах эдэр ыччат, култуура тэрилтэлэригэр сылдьарын судаарыстыба уйунар буолуоҕа.
Саха сиригэр, «Пушкин картата» диэн федеральнай бырагыраамма олоххо киирдэҕинэ, эдэр дьон култуурнай тэрээһиннэргэ буор-босхо сылдьар буолуоҕа. Тосхол бастакы түһүмэҕэр – тыйаатырдар, түмэллэр уонна филармония киирэллэр.
Өрөспүүбүлүкэ култууратын миниистирэ Юрий Куприянов ол туһунан маннык сырдатта: «Хас ый ахсын, “Пушкин картатыгар” үс тыһыынча харчы кэлэн түһүөҕэ. Бу харчыны ыччаттар, култуура тэрилтэлэригэр сылдьарга эрэ туттар кыахтаныахтара».
Култуура тэрилтэлэрэ бу бырагырааммаҕа киирсэн, үлэлэһэн баралларыгар, кинилэртэн электроннай билиэт хаассатын арыйыы уонна “Прокультура РФ” порталга регистрацияны барыы ирдэнэр. Бүгүҥҥү күн туругунан ирдэбиллэргэ толору эппиэттэһэллэр – Саха сирин Судаарыстыбыннай опера уонна балет тыйаатыра, А.С. Пушкин аатынан Судаарыстыбыннай академическай, драматическай нуучча тыйаатыра, өрөспүүбүлүкэ Судаарыстыбыннай филармонията уонна «Россия – моя история» Түмэл комплекса.
Билиҥҥитэ, карта дьайыыта култуура судаарыстыбыннай эрэ тэрилтэтигэр тарҕаныаҕа, ол эрээри инникитин чааһынай култуура тэрилтэлэригэр эмиэ үлэлиир буолара күүтүллэр.
Салгыы, бырагырааммаҕа кыттыһар култуура уонна ускуустуба тэрилтэлэрин сүүмэрдээһин, Саха сирин култуураҕа уонна духуобунаска сайдыытын министиэристибэтин эспиэрдэрин сүбэтинэн ыытыллыаҕа. “Пушкин картатын” арыйыы туһунан этиини, дойду бэрэсидьиэнэ Владимир Путин сылын ахсын ыытыллар быһа ситим кэмигэр, от ыйын бүтэһигэр киллэрбитэ.
