Татарстан Өрөспүүбүлүкэтигэр ыытыллыбыт аан дойдутааҕы аныгы ускуустуба арт-симпозиумыгар Саха сирин худуоһунньуга Мира Аргунова Шахерезада остуоруйаларын матыыптарынан хас да үлэтин уонна арыылаах кыраасканан уруһуйдаммыт «Эйигиттэн сүрэҕим жасмин сибэккинэн туолар» диэн улахан кээмэйдээх хартыынатын дьон-сэргэ киэҥ дьүүлүгэр туруорда.
Хартыына персидскай поэт Джалаладдин Руми «Диван Шамса Тебризи» диэн хомуурунньугуттан ылыллыбыт тылларынан ааттанна. Ис хоһооно түүр тыллаах литэрэтиирэни төрүттээччи Кул Гали Орто үйэтээҕи «Кысса-и Йусуф» («Кэрэ сирэйдээх Йусуф туһунан номох») диэн бэйиэмэтин биир кэрчик түгэнин көрдөрөр.
«Түүр тылынан суруллубут саамай бастакы улахан литэрэтиирэ айымньытын ис хоһоонунан уруһуйдаммыт хартыынаҕа болҕомтолоох көрөөччү хас да хаан-уруу норуоттар материальнай култуураларыгар сыһыаннаах уратылары булан бэлиэтии көрөр кыахтаах. Холобур, тутуулар ойууларыгар уонна киэргэллэригэр хас да түүр тыллаах омук үгэс буолбут ойуутун-бичигин, ону таһынан саха чороонугар майгынныыр иһити-хомуоһу уонна Уфа куорат түмэлин кэлиэксийэтигэр харалла сытар, тыһыынчанан сыллаах устуоруйалаах туой иһиттэри көрүөххэ сөп. Хартыынаҕа ойууламмыт үрүҥ көмүс мастар – бу Ыһыах ыһыллар түһүлгэлэрин киэргэтэр, сахалар ытык Аал Луук Маспыт буолар», – диэн Мира Аргунова кэпсээтэ.
Бэй.кэр.
Хаартыска: Мира Аргунова архыыбыттан.
