Быйыл Кэбээйигэ ыытыллыахтаах Олоҥхо ыһыаҕын арыллыытыгар балтараа тыһыынча кэриҥэ киһи кыттыаҕа. Тэрээһин сүрүн режиссера – Руслан Тараховскай.
“Быйыл биһиги Кэбээйи улууһун барытын кэрийдибит: култуураны, нэһилиэнньэ олоҕун-дьаһаҕын укулаатын үөрэттибит, ону сынаарыйга киллэрдибит. Улуус уобарастарын, култууратын уонна бэлиэлэрин арыйар, олус үчүгэй, дьоро тэрээһини көрдөрүөхпүтүн баҕарабыт. Сүрүн тиэмэтэ – Кэбээйи, бүттүүн Саха сирин уонна хас биирдии киһи төрөөбүт-үөскээбит сирин-уотун улуу күөллэригэр сүгүрүйүү. Сүрүн оруоллары Кэбээйи киэн туттар дьоно – ааттаах-суоллаах спортсменнар, култуура үтүөлээх үлэһиттэрэ, норуот артыыстара – толоруохтара”, – диэн сүрүн режиссер сырдатар.
Ыһыах ыалдьыттара кылбар киирсиилэрдээх мас тардыһыытын, хапсаҕайы, атынан сүүрдэн иһэн оҕунан ытыыны, “Эр Бэрдэ” дэгит күрэһи көрүөхтэрэ. Баҕалаах дьон “Саха сирин улуустарын амтана” ас-үөл түһүлгэтигэр сылдьан улуустарга астанар төрүт ас арааһын амсайыахтара.
Олоҥхо ыһыаҕын киэҥ далааһыннаах арыллыыта от ыйын 4 күнүгэр сарсыарда 11:00 чаастан буолуоҕа. “Саха” НКИХ тэлэбиидэнньэтэ уонна араадьыйата ону барытын быһа эфиргэ көрдөрүө.
“Сүрүн түһүлгэлэр тутуулара түмүктэнэн эрэр. Туох ханна, хайдах быһыылаахтык ыытыллара барыта быһаарыллан турар. Быйыл биһиги олохтоох бородууксуйаны оҥорор олус элбэх урбаанньыты күүтэбит. Ыһыахха барыта сэттэ тыһыынча кэриҥэ киһи кэлиэ диэн сабаҕалыыбыт”, – диэн улуус баһылыгын социальнай боппуруоска солбуйааччы Анна Попова кэпсээтэ.
