Кулун тутар 27 күнүгэр А.Е. Кулаковскай аатынан норуоттар доҕордоһууларын Дьиэтигэр А.Д. Макарова аатынан Дьокуускайдааҕы култуура уонна урамньы кэллиэһин отчетнай гала-кэнсиэрэ буолан ааста. Үгэс быһыытынан, кэнсиэркэ үөрэх кыһатын устудьуоннара уонна айар бөлөхтөрө сыл устата туруорбут бастыҥ нүөмэрдэрэ киирдилэр.
Тэрээһиҥҥэ СӨ култуураҕа уонна духуобунай сайдыыга миниистирэ Афанасий Ноев сырытта. Кини СӨ Бырабыытылыстыбатын махтал суруктарын кэллиэс учууталлара Сардаана Семеноваҕа уонна Валентина Тарбаеваҕа туттарда. Ону таһынан, «Өркөн» норуодунай үҥкүү ансамблын салайааччыта Алена Павлова «Норуот айымньытын үтүөлээх бөлөҕө» диэн бочуоттаах ааты иҥэрии туоһу суругун тутта. Бу ааты иҥэрии туһунан Арассыыйа Култууратын миниистирэ Ольга Любимова саҥа дьыл иннинэ бирикээс таһаарбыта.
Кэнсиэркэ үгэс буолбут «Күн Өркөн» бириэмийэни урукку сыллардааҕы выпускниктарга култуура уонна урамньы сайдыытыгар киллэрбит кылааттарын уонна айар ситиһиилэрин иһин туттардылар.
Ону таһынан, «Күн Өркөн» «Эрэл» бириэмийэтинэн үөрэхтэрин бүтэрэр устудьуоннары бэлиэтээтилэр.
Гала-кэнсиэр бырагырааматыгар барыта 20-тэн тахса норуодунай уонна аныгы үҥкүү, фольклорнай нүөмэрдэр (үҥкүү, чабырҕах, хомус уонна кырыымпа оонньуута), эстраднай миниатюралар, ырыалар киирдилэр.
Бу туһунан А.Д. Макарова аатынан Дьокуускайдааҕы култуура уонна урамньы кэллиэһэ суруйар
Хаартыска: Ксения Гаврильева, Винокуров Айтал, Анна Кривошапкина
