Бу киинэ саха биллиилээх суруйааччыта Тимофей Сметанин айымньыларын матыыптарынан уһуллубута уонна сахалыы кинематографка саҥа олугу уурда — уһуллубут кыллары сөптөөхтүк хамсатарга компьютер технологияларын кыайа-хото туһаннылар.
Киинэ сүрүннээн оҕолорго ананар. Ол иһин айымньылары кинилэргэ дөбөҥнүк өйдөнөр гына “илдьиритэн” биэрбиттэр.
СӨ Инновацияҕа, сыыппара сайдыытыгар уонна инфокоммуникация технологиятын миниистирэ Петр Николаев: «Бүгүн биһиги саха кинематограбын устуоруйатыгар уһулуччулаах түгэн кэрэһиттэрэ буоллубут. «Мэхэлэчээн Булчут. Мои таежные каникулы» хартыынаны устарга аныгы компьютернай технология муҥутуур элбэхтик туттулунна. Бу Саха сиригэр киинэ индустрията сайдарыгар саҥа хардыы буолар. Ону таһынан, суруйааччы Тимофей Сметанин айымньылара аныгы оҕолорго ордук дэбигистик тиийэр саҥа форматынан тахсыбытын бэлиэтиибин», — диэтэ.
Миниистир киинэни устубут, бэлэмнээбит продюсердарга, сценаристарга, режиссерга, артыыстарга уонна атын исписэлиистэргэ барҕа махтал тылларын эттэ. Чуолаан “Сахапечать” тэрилтэ генеральнай дириэктэригэр Ньургуйаана Стручковаҕа уонна «Улусмедиа» саайт үлэһиттэригэр махтанна.
«Креативнай индустрияны сайыннарар хамаандабытын кытта, биһиги маннык бырайыактары өйүүргэ куруутун бэлэммит. Тоҕо диэтэххэ, кинилэр саха омук ускуустубатын Арассыыйаҕа уонна тас дойдуларга арыйаллар, тарҕаталлар. Маннык киинэлэринэн өрөспүүбүлүкэбитолоҕун, саха омук төрүт дьарыктарын, абыычайдарын туһунан тиийимтиэтик, киэҥ далааһыннаахтык кэпсиир буолуохпут », — диэн Петр Николаев тоһоҕолоон эттэ.
«Мэхэлэчээн Булчут. Мои таежные каникулы» киинэ нуучча тылынан тылбааһа тэҥинэн барар. Онон сахалыы билбэт да дьон үөрэ-көтө көрүөхтэрэ. Киинэ тыйаатырдарыгар хартыына кулун тутар 19 күнүттэн прокатка тахсыаҕа диэн мэктиэлээтилэр.
СӨ Инновацияҕа, сыыппара сайдыытыгар уонна инфокоммуникация технологиятын министиэристибэтэ.
Хаартыска: Улус.Медиа
