Ил Түмэн чугастааҕы сиэссийэтигэр СӨ бырабыыталыстыбатын бэрэссэдээтэлин солбуйааччы Георгий Степанов кэлиҥҥи 7 сыл иһигэр Саха сиригэр номинальнай дохуот уонна хамнас биллэ улааппытынан, дьадаҥы дьон ахсаана аҕыйаабытын туһунан иһитиннэриэхтээх
Дьадайыыны утары охсуһууга бырабыыталыстыба 21 көрдөрүүнү былааннаабытыттан, 15-н олоххо киллэрбит.
Кэлэр 3 сыл тутаах былаана – 2028 с. диэри бу ситиһиллибит үтүө көрдөрүүнү, дохуот инфляцияны куотан иһиитин ыһыктыбакка, дьадаҥы дьон ахсаанын 7,6%-ҥа тиийэ аҕыйатыы.
Өрөспүүбүлүкэ бырабыыталыстыбатын чахчыларынан 2018 с. бэттэх Саха сирин олоҕо хайдах уларыйда, 2028 с. диэри былаас туох былааннааҕый?
Ааспыт 7 сыл иһигэр Саха сирин олохтоохторун дууһаҕа тиксэр харчынан дохуоттара 2-тэн ордук төгүл улааппыт:
2018 с. – ыйга 42 891 солк.;2025 с. – ыйга 91 493 солк.
Орто хамнас эмиэ эрэллээхтик эбиллэ-үүнэ турар, икки төгүл улааппыт;
2018 с. – 68 871 солк.;2025 с. – 139 435 солк.
Өрөспүүбүлүкэбитигэр хамнас алын кээмэйэ (МРОТ) биллэ эбиллибит (хотугу кээписиэни учуоттаан туран). Ол курдук, 2018 с. МРОТ 23 723 солк. буоллаҕына, 2025 с. 56 100 солк. тэҥнэспит.
Дьадаҥы дьон ахсаана сыыйа аҕыйаан иһэр:
2018 с. – 18,6%;2025 с. – 12,6%.
2018 сыллаахха дьадаҥы дьон ахсаана 180,1 тыһ. киһи буоллаҕына, 2025 с. 126,9 тыһ. киһи буолбут.
Өрөспүүбүлүкэ былаастара баһырхай былааннаах олороллор. 2028 с. дьадайыы таһыма 7,6 бырыһыаҥҥа тиийэ аҕыйыахтаах (Ил Дархан дьадайыыны утары тус сыаллаах ыйааҕа). Онон 2028 с. маннык көрдөрүү ситиһиллиэхтээх:
Дууһаҕа ортотунан тиксэр дохуот: ыйга 113 937 солк.;Орто хамнас: ыйга 180 738 солк.;МРОТ: ыйга 78 400 солк.Дьон диҥнээх дохуота (инфляцияны учуоттаан) сыллата 3,9—4,8%-нан эбиллэ туруохтаах.
Нэһилиэнньэ тиийиммэт-түгэммэт араҥатын харчынан дохуотун бүттүүн дефицитэ кэлиҥҥи сылларга сылга 11,5 млрд солк. кэриҥэ буолан турар.
Бэй.кэр.
Хаартыска: Мария Васильева/СИА
