2026 сыл алта ыйын иһигэр Саха сиригэр барыта 24 туонна кыһыл көмүс хостоммутун туһунан СӨ бырамыысыланнас уонна геология миниистирин солбуйааччы Андрей Сычевскай сырдатта. Сыл бүтүүтүгэр барыта 56—57 туонна хостонуохтаах.
Ол гынан баран, Сычевскай этэринэн, өрөспүүбүлүкэ рекордары сырсар былаана суох. Бу күннээххэ хампаанньалар кыахтарын-таһымнарын үрдэтэллэр, эрэспиэккэлэрин түмүктээн, саҥа учаастактары бэлэмнээн бүтэн эрэллэр.
“2032—2035 сс. Саха сирэ сылга 70—75 туонна кыһыл көмүһү хостуур буолуо диэн былаанныыбыт. Оннук сибики номнуо баар. Роснедраны уонна РФ Айылҕа харыстабылыгар министиэристибэтин кытта үлэлэһии түмүгэр саҥа учаастактар, лиссиэнсийэлээх түөлбэлэр үлэҕэ киирэллэр”, – диэн миниистир солбуйааччыта этэр.
Кэлиҥҥи икки сыл устата кыһыл уонна үрүҥ көмүс сыаната ыараан, инвестордар бэркэ сэҥээрэр буолбуттар. Үп-харчы киирэн, үлэ-хамнас тэтимирбит. Холобур, былырыын бүддьүөт дохуоттаах өлүүтүн 20%-на көмүс хостооһунун нолуогуттан киирэн, ньиэп-гаас киллэрэр өлүүтүн биллэ куоһарбыт.
Үрүҥ көмүс бырамыысыланнаһын туруга эмиэ куһаҕана суох. Былырыын Саха сирэ үрүҥ көмүһү хостуурга Арассыыйаҕа бастакы миэстэҕэ тахсыбыт.
