Бу күннэргэ дойду бырабыыталыстыбата Уһук Илин уонна Арктика 2%-наах ипотекаларын бырагырааматын уларыппытын, хапсар дьон кэккэтин кэҥэтэн биэрбитин туһунан Ил Дархан Айсен Николаев иһитиннэрдэ.
Мантан антах чэпчэтиилээх ипотеканан аҥаардас быраастар эрэ буолбакка, судаарыстыбаннай уонна муниципальнай мэдиссиинэ тэрилтэлэрин бары үлэһиттэрэ – биэлсэрдэр, сиэстэрэлэр-бырааттар, лабарааннар, саньытаардар, ону тэҥэ орто уона алын медперсонал уонна да атыттар – туһанар буолуохтара.
Итини таһынан, чэпчэтиилээх ипотеканы Арассыыйа территориятыгар саалаах-сэптээх саба түһүүнү утарсыыга уонна АБДь ыытылла турар оройуоннарын таһынааҕы судаарыстыбаннай кыраныыссаларга провокациялары уодьуганныырга кыттыбыт дьон ылар кыахтаммыттар.
Даҕатан эттэххэ, Саха сиригэр 34 тыһыынчаттан тахса Уһук Илин уонна Арктика чэпчэтиилээх ипотеката бэриллибит. Ол бырагыраамаҕа дьон наадыйарын туоһулуур.
