Ахсынньы 23 күнүгэр Ил Дархан Айсен Николаев АЛРОСА хампаанньа 2025 сыллааҕы үлэтин-хамнаһын түмүктэрин уонна кэлэр сыллааҕы былаанын туһунан мунньахтаата.
Онно этиллибитинэн, хампаанньа 2025 сылга алмааһы хостуур былаанын толорбут. Онон аан дойду алмааһын үс гыммыттан биирин хостуур улахан хампаанньа буоларын өссө төгүл дакаастаабыт. Төһө даҕаны ааһан эрэр сылга алмаас аан дойдутааҕы ырыынага уустуктары көрүстэр, АЛРОСА 29,7 мөл. карааты хостообут.
“Хампаанньаҕа судургута суох сыл ааһан эрэр. Ол гынан баран, төһө да уустуктар баалларын иһин, АЛРОСА оҥорон таһаарыы көрдөрүүтүн барытын ситистэ, кыттыһан тэрийэр социальнай бэлиитикэбитин толордо. Удачнайдааҕы ХБК-ны уонна Накыыннааҕы оҥорон таһаарар түһүлгэни гааһынан хааччыйар олус суолталаах бырайыактары олоххо киллэрдэ. Ити хампаанньа биир сиргэ турбатын, иннин диэки эрэллээхтик хардыылыырын туоһулуур. Ол иһин мин хампаанньа кэлэктиибигэр истиҥник махтанабын”, – диэн Ил Дархан Айсен Николаев бэлиэтээтэ.
Павел Маринычев эппитинэн, хампаанньа үбүн-харчытын туруга этэҥҥэ. Төһө даҕаны кириисис уонна сааҥсыйа ыктар, АЛРОСА барыстаахтык үлэлиир. Оттон ол – аан дойдуга алмаас хостооһунун эйгэтигэр ураты көстүү.
2025 сыллаахха АЛРОСА геология чинчийиитин комплекса тутаах баайдаах сирдэргэ минерал-сырье базатын хаҥатан биллэрдик сайдыбыт. Сир баайдаах сирдэр саппаастара хаҥаабыт, Мииринэй таһынааҕы ресурсалар чопчуламмыттар, сир үөһээ араҥатыгар уонна кэскиллээх түөлбэлэргэ эбиллии бэлиэтэммит. Ол түмүгэр хампаанньа кэлэр 25–30 сылга бигэ үлэтэ хааччыллар кыахтаммыт.
АЛРОСА биир сүрүн соруга – сир баайдаах сирдэр “олохторун” уһатыы уонна сир аннынааҕы хостуур үлэни сайыннарыы. Инвестиция көмөтүнэн “Удачнай” рудникка сир баайа 2055 с. диэри хостонуохтаах. Билигин сир аннынааҕы “Мир-Глубокий” рудник уонна “Юбилейная” туруупка бырайыактара оҥоһуллаллар.
Хампаанньа көмүһү ситиһиилээхтик салгыы хостуур. Болҕомто киинигэр – 2030 сылга 3,3 туоннаҕа тиийэ көмүһү хостуур буолуохтаах, Магадаан уобалаһыгар үлэлиэхтээх “Дегдакан” бырайыак инфраструктуратын бэлэмнээһин, ону тэҥэ Саха сиригэр уонна Арассыыйа атын эрэгийиэннэригэр геология чинчийиитин салгыы кэҥэтии. 2025 сылтан хампаанньа Анаабырга сир үөһээ араҥатыгар баар көмүһү сиртэн хостонор сүрүн баай быһыытынан хостуур буолла.
2025 с. биир сүрүн ситиһиитэ диэн алмаас бородууксуйата таһаарар “углеродун суола” “нейтральнай” буолара билиминэн бигэргэтиллибитэ. Онтун ааһан, хампаанньа бордууксуйата аҥаардас “нейтральнай” эрэ буолбакка, өссө буортулаах гаастары иҥэринэр дьоҕурдааҕа быһаарыллыбыта. Ол курдук, алмаас хостонор кэмигэр сылга 1 мөл. туонна кэриҥэ углекислай хааһы “оборор”. Оттон ол аан дойдуга хостонор хас үһүс алмаас килиимэккэ туһалыырын туоһулуур.
2026 с. АЛРОСА болҕомтотун уһун кэмнээх сайдыыга, технология эйгэтигэр бастыҥ буоларга уонна алмаас ырыынага саҥаттан сайдыытыгар бэлэмнэниигэ ууруохтаах.
kyym.ru
