Муус устар 2 күнүгэр Дьокуускайга “Сэдэх: саха түмэлин артефактора” диэн Е.Ярославскай түмэлин сэдэх уонна ураты матырыйаалларын туһунан сэһэргиир быыстапка арылынна. Көрдөрүүгэ өрөспүүбүлкэ араас муннугар ыытыллыбыт археология-билим чинчийиилэрин түмүгэр көстүбүт 60-тан тахса экспонат турбут. Быыстапканы СӨ култууратын үтүөлээх үлэһитэ В.В. Попов-Быдылыкы Баһылай үөрэнээччилэрэ Анатолий Семенов уонна Александра Михайлова бэлэмнээбиттэр.
“Саха сирин устуоруйатын араас кэрдиис кэмин хабан көрдөрөр соһуччу да, анал, сыаллаах-соруктаах да эспэдииссийэлэр түмүктэригэр көстүбүт булумньулар бааллар”, – диэн түмэл археологияҕа уонна этнографияҕа салаатын сэбиэдиссэйэ Анатолий Семенов үллэстэр.
Быыстапкаҕа сылдьыбыт дьон 2006 с. Булуҥтан көстүбүт сарматтар саабылаларын, палеолит үйэтин саҕанааҕы тайах ойуулаах таас сүгэни, 15 сыл устата үлэлээбит саха-боронсуус эспэдииссийэтин үлэтин түмүктэрин, о.д.а. көрүөхтэрин сөп.
Быыстапка муус устар 23 күнүгэр диэри туруоҕа.
