Арассыыйаҕа маҕаһыыннары, кафелары уонна эрэстэрээннэри омуктуу ааттыыры бобуохтара. Ити тэрилтэлэр ааттара барыта нууччалыы эбэтэр олохтоох омуктар тылларынан эрэ суруллар буолуоҕа.
Аангылыйа тылын (англицизм) хааччахтыыр туһунан сокуон барылын бу күннэргэ Госдумаҕа бастакы ааҕыыга бигэргэттилэр.
Бэлиэтээн эттэххэ, сокуон барыла бастакы ааҕыыны ааста да олоххо киирэр диэн буолбатах. Эбии икки ааҕыыны ааһыан наада. Госдума култуураҕа кэмитиэтин салайааччыта Ольга Казакова эппитинэн, ону таһынан сокуон барылын сүрүн тиэкиһэ бэлэмнэниэхтээх. Билигин барыл сүнньүн эрэ өйөөбүттэр. Өссө да элбэх эспэртиисэни ааһыахтаах.
Анна Хрусталева диэн арбитраж салайааччыта этэринэн, өскөтүн сокуону үһүс ааҕыыга ылыннахтарына, үөһэ ахтыллыбыт тэрилтэлэргэ омуктуу ааты биэрэр тохтуохтаах. Ону тэҥэ “coffee”, “sale”, “shop” эҥин диэбит курдук суруктарбыт нууччалыы солбуллуохтаахтар: “кофе”, “распродажа”, “скидка”, “магазин”. Холобур, “Сoffeeshop Company” диэн Дьокуускайга биллэр тэрилтэ ситимэ “Кофе маҕаһыынын Хампаанньата”, “Food bar” – “Аһылык бара” буолуохтарын сөп.
